ಸಿಜೆಐ ಕಚೇರಿಯ ದುರ್ಬಳಕೆಗೆ ತಂತ್ರ: ಕಾಂಗ್ರೆಸ್‍ನ ಅಪಕ್ವ ನಡೆಯಿಂದ ನ್ಯಾಯಾಂಗ ವ್ಯವಸ್ಥೆಗೆ ಅಪಾಯ

 ನೇರಾನೇರ * ಬಿವಿಸೀ

ದೇಶದ ಮುಖ್ಯ ಚುನಾವಣಾ ಆಯುಕ್ತರ (ಸಿಇಸಿ) ವಜಾಗೆ ಒತ್ತಾಯಿಸಿ ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಹಾಗೂ ರಾಹುಲ್ ಗಾಂಧಿ ಅವರು ಭಾರತದ ಮುಖ್ಯ ನ್ಯಾಯಮೂರ್ತಿಗಳನ್ನು (ಸಿಜೆಐ) ಭೇಟಿಯಾಗಲು ಅನುಮತಿ ಕೋರಿರುವುದು ಪ್ರಜಾಪ್ರಭುತ್ವದ ಸಾಂವಿಧಾನಿಕ ನಿಯಮಗಳಿಗೆ ಎಸಗಿದ ಘೋರ ಅಪಚಾರ. ದಿನನಿತ್ಯ ಬೀದಿಗಳಲ್ಲಿ ಮತ್ತು ಮಾಧ್ಯಮಗಳ ಮುಂದೆ ನಡೆಸುತ್ತಿದ್ದ ರಾಜಕೀಯ ವಾಗ್ದಾಳಿಯನ್ನು, ಕಾನೂನು ತಜ್ಞರು ಅಥವಾ ವಕೀಲರ ಮಾರ್ಗವನ್ನು ಬದಿಗಿಟ್ಟು, ವೈಯಕ್ತಿಕವಾಗಿ ಉನ್ನತ ನ್ಯಾಯಾಲಯದ ಪೀಠಕ್ಕೆ ತರಲು ಹೊರಟ ಈ ನಡೆ ಅತ್ಯಂತ ಖಂಡನೀಯ ಹಾಗೂ ಕಾನೂನುಬಾಹಿರವಾದುದು.

ನ್ಯಾಯಮೂರ್ತಿ ಸೂರ್ಯ ಕಾಂತ್ ಅವರು ಕಾಂಗ್ರೆಸ್ ನಾಯಕರ ಈ ಅಸಾಂವಿಧಾನಿಕ ಭೇಟಿಯ ಕೋರಿಕೆಯನ್ನು ತಿರಸ್ಕರಿಸಿ, ಸೂಕ್ತ ನಿಯಮಾವಳಿಗಳನ್ನು ನೆನಪಿಸಿರುವುದು ನ್ಯಾಯಾಂಗದ ಸ್ವಾಯತ್ತತೆಯನ್ನು ಎತ್ತಿಹಿಡಿದ ಅತ್ಯಂತ ಪ್ರಾಮಾಣಿಕ ಮತ್ತು ದಿಟ್ಟ ಕ್ರಮವಾಗಿದೆ. ನಿಯಮಿತ ಕಾನೂನು ಪ್ರಕ್ರಿಯೆಯನ್ನು ಗಾಳಿಗೆ ತೂರಿ, ಉನ್ನತ ನ್ಯಾಯಾಂಗದ ಕಚೇರಿಯನ್ನು ತಮ್ಮ ರಾಜಕೀಯ ಲಾಭಕ್ಕಾಗಿ ಹಾಗೂ ಪಕ್ಷಪಾತದ ಉದ್ದೇಶಗಳಿಗಾಗಿ ಬಳಸಿಕೊಳ್ಳಲು ಯತ್ನಿಸಿದ್ದು ನೂರಕ್ಕೂ ಹೆಚ್ಚು ವರ್ಷಗಳ ಇತಿಹಾಸವಿರುವ ಪಕ್ಷಕ್ಕೆ ಶೋಭೆಯಲ್ಲ.

ಅರ್ಧ ಶತಮಾನಕ್ಕೂ ಹೆಚ್ಚು ಕಾಲ ದೇಶವನ್ನಾಳಿದ ಅನುಭವವಿದೆ ಎಂದು ಹೇಳಿಕೊಳ್ಳುವ ಕಾಂಗ್ರೆಸ್ ನಾಯಕತ್ವದ ಇಂತಹ ನಡೆ, ಅವರ ರಾಜಕೀಯ ಅಪಕ್ವತೆಯನ್ನು ಮತ್ತು ಸಾಂವಿಧಾನಿಕ ಸಂಸ್ಥೆಗಳ ಮೇಲಿರುವ ನಿರ್ಲಕ್ಷ್ಯವನ್ನು ಎತ್ತಿಹಿಡಿಯುತ್ತದೆ. ಪ್ರಜಾಪ್ರಭುತ್ವದ ಮೂಲಸ್ತಂಭಗಳಾದ ಚುನಾವಣೆ ಆಯೋಗ ಹಾಗೂ ನ್ಯಾಯಾಂಗದಂತಹ ಸ್ವತಂತ್ರ ಸಂಸ್ಥೆಗಳನ್ನು ತಮ್ಮ ರಾಜಕೀಯ ಹಿತಾಸಕ್ತಿ ಸಾಧನೆಗಾಗಿ ದಾಳವಾಗಿ ಬಳಸಿಕೊಳ್ಳಲು ಹೊರಟಿರುವುದು ಅತ್ಯಂತ ಅಪಾಯಕಾರಿ ಪ್ರವೃತ್ತಿ. ಕೇವಲ ಒಂದು ಕುಟುಂಬದ ರಾಜಕೀಯ ಅಧಿಕಾರವನ್ನು ಮರುಸ್ಥಾಪಿಸುವ ಏಕೈಕ ಅಜೆಂಡಾವನ್ನು ಇಟ್ಟುಕೊಂಡಿರುವ ನಾಯಕತ್ವದಿಂದ ಇಂತಹ ಅಸಂವಿಧಾನಿಕ ಹೆಜ್ಜೆಗಳು ಮೂಡಿಬರುತ್ತಿರುವುದು ಆತಂಕಕಾರಿ.

ಇಂತಹ ಬೇಜವಾಬ್ದಾರಿ ತಂತ್ರಗಳು ಕೇವಲ ನ್ಯಾಯಾಂಗದ ಘನತೆಗೆ ಕುಂದು ತರುವುದಲ್ಲದೆ, ಸಾಂವಿಧಾನಿಕ ಚೌಕಟ್ಟಿನಲ್ಲಿ ಕಾಯಾರ್ಂಗ, ಶಾಸಕಾಂಗ ಮತ್ತು ನ್ಯಾಯಾಂಗದ ನಡುವೆ ಇರುವ ಸೂಕ್ಷ್ಮ ಸಮತೋಲನವನ್ನೇ ಬುಡಮೇಲು ಮಾಡುತ್ತವೆ. ಸಾರ್ವಜನಿಕವಾಗಿ ನಿರೂಪಣೆಗಳನ್ನು ಸೃಷ್ಟಿಸಲು ದೇಶದ ಅತ್ಯುನ್ನತ ನ್ಯಾಯಾಲಯವನ್ನು ಬಳಸಿಕೊಳ್ಳುವುದು ರಾಜಕೀಯ ಅಸಹಾಯಕತೆಯ ಸಂಕೇತವಾಗಿದೆ.

ಉನ್ನತ ನ್ಯಾಯಾಂಗವು ದೇಶದ ಸಂವಿಧಾನ ಮತ್ತು ಕಾನೂನಿನ ರಕ್ಷಕನೇ ಹೊರತು, ರಾಜಕೀಯ ಪಕ್ಷಗಳ ಅಸಮಾಧಾನ ಅಥವಾ ಸಾರ್ವಜನಿಕ ಆರೋಪಗಳನ್ನು ಆಲಿಸುವ ರಾಜಕೀಯ ವೇದಿಕೆಯಲ್ಲ. ಸಿಜೆಐ ಕಚೇರಿಯನ್ನು ತನ್ನ ಪಟ್ಟಭದ್ರ ಹಿತಾಸಕ್ತಿಗೆ ಬಳಸಿಕೊಳ್ಳಲು ಯತ್ನಿಸಿದ ಕಾಂಗ್ರೆಸ್‍ಗೆ ಸಾರ್ವಜನಿಕರು ಮತ್ತು ಸಾಂವಿಧಾನಿಕ ತಜ್ಞರು ತಕ್ಕ ಪಾಠ ಕಲಿಸಬೇಕಿದೆ. ಸ್ವತಂತ್ರ ಸಂಸ್ಥೆಗಳ ಮೇಲಿನ ಸಾರ್ವಜನಿಕರ ನಂಬಿಕೆಯನ್ನು ಕುಸಿಯುವಂತೆ ಮಾಡುವ ಇಂತಹ ಅಗ್ಗದ ರಾಜಕೀಯ ತಂತ್ರಗಳನ್ನು ಕಾಂಗ್ರೆಸ್ ನಾಯಕತ್ವ ತಕ್ಷಣವೇ ಕೈಬಿಡಬೇಕಿದೆ.