ಭ್ರಷ್ಟಾಚಾರಕ್ಕೆ ಜಾತಿಯ ಕವಚ ಏಕೆ?

 ಇರೋದು ಇದ್ದಂಗೆ * ಬಿವಿಸೀ

ಬಿ ನಾಗೇಂದ್ರ ಅವರನ್ನು ಮತ್ತೆ ಸಚಿವ ಸಂಪುಟಕ್ಕೆ ಸೇರಿಸಿಕೊಳ್ಳುವ ಕಾಂಗ್ರೆಸ್‍ನ ನಿರ್ಧಾರವು ರಾಜಕೀಯವಾಗಿ ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ ಮಾತ್ರವಲ್ಲ, ಇದು ಪಕ್ಷಕ್ಕೆ ಆತ್ಮಹತ್ಯಾಕಾರಿಯಾಗಿಯೂ ಪರಿಣಮಿಸಲಿದೆ. ವಾಲ್ಮೀಕಿ ಪರಿಶಿಷ್ಟ ಪಂಗಡಗಳ ಅಭಿವೃದ್ಧಿ ನಿಗಮದ ಹಣದ ದುರುಪಯೋಗ ಪ್ರಕರಣದಲ್ಲಿ ನಾಗೇಂದ್ರ ಆರೋಪಿಯಾಗಿದ್ದು, ಅವರನ್ನು ಬಂಧಿಸಲಾಗಿತ್ತು. ಅವರ ವಿರುದ್ಧ ಗಂಭೀರ ಆರೋಪಗಳು ಕೇಳಿಬಂದಿರುವ ಸಂದರ್ಭದಲ್ಲಿ ಮತ್ತೆ ಸಚಿವ ಸ್ಥಾನ ನೀಡಿರುವುದು ಸಾರ್ವಜನಿಕರಲ್ಲಿ ಸಹಜವಾಗಿಯೇ ಅನುಮಾನ ಮೂಡಿಸಿದೆ. ಕಳಂಕಿತ ವ್ಯಕ್ತಿಯನ್ನು ಅವರು ನಿರ್ದೋಷಿಯೆಂದು ಸಾಬೀತಾಗುವ ಮುನ್ನವೇ ಮಂತ್ರಿಯಾಗಿ ಮರಳಿಸಿದ ಪಕ್ಷಕ್ಕೆ ಅದ್ಯಾವ ಅನಿಯಾರ್ಯತೆ ಇತ್ತು ಎಂಬುದು ಊಹಾಪೋಹಕ್ಕೆ ಎಡೆಮಾಡಿದೆ. ಪಕ್ಷದ ಪ್ರಮುಖರ ಚಾರಿತ್ರ್ಯದ ಮೇಲೆಯೂ ಕರಿಮೋಡ ಆವರಿಸುವಂತೆ ಮಾಡಿದೆ.

ಆರೋಪ ಸಾಬೀತಾಗುವವರೆಗೆ ವ್ಯಕ್ತಿಯನ್ನು ಅಪರಾಧಿ ಎಂದು ಕರೆಯಲು ಸಾಧ್ಯವಿಲ್ಲ ಎಂಬ ಕಾನೂನು ತತ್ವ ಸರಿ. ಆದರೆ ಸಚಿವ ಸ್ಥಾನವು ಕೇವಲ ಕಾನೂನುಬದ್ಧ ಅರ್ಹತೆಯ ಪ್ರಶ್ನೆಯಲ್ಲ; ಅದು ಸಾರ್ವಜನಿಕ ನೈತಿಕತೆ ಮತ್ತು ರಾಜಕೀಯ ವಿಶ್ವಾಸದ ಪ್ರಶ್ನೆಯೂ ಹೌದು. ತನಿಖೆ ಎದುರಿಸುತ್ತಿರುವ ವ್ಯಕ್ತಿಯನ್ನು ಸಚಿವರನ್ನಾಗಿ ಮಾಡುವ ಮೂಲಕ ಕಾಂಗ್ರೆಸ್ ಯಾವ ಸಂದೇಶ ನೀಡುತ್ತಿದೆ ಎಂಬುದೇ ಮುಖ್ಯ. ಆರೋಪಗಳ ಬಗ್ಗೆ ಸಂಪೂರ್ಣ ತನಿಖೆ ಮುಗಿಯುವವರೆಗೆ ದೂರ ಉಳಿಯುವುದು ಪಕ್ಷದ ನೈತಿಕತೆಯನ್ನು ಎತ್ತಿಹಿಡಿಯುವ ಮಾರ್ಗವಾಗಬಹುದಿತ್ತು.

ವಿಶೇಷವಾಗಿ, ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರದ ವಿರುದ್ಧ ಭ್ರಷ್ಟಾಚಾರದ ಆರೋಪಗಳನ್ನು ಮುಂದಿಟ್ಟುಕೊಂಡು ಕಾಂಗ್ರೆಸ್ ನಿರಂತರವಾಗಿ ರಾಜಕೀಯ ಹೋರಾಟ ನಡೆಸಿದೆ. ಆದರೆ ತನ್ನದೇ ಸರ್ಕಾರದಲ್ಲಿ ಗಂಭೀರ ಭ್ರಷ್ಟಾಚಾರ ಪ್ರಕರಣದ ಆರೋಪ ಎದುರಿಸುತ್ತಿರುವ ವ್ಯಕ್ತಿಯನ್ನು ಮತ್ತೆ ಸಂಪುಟಕ್ಕೆ ಸೇರಿಸಿಕೊಂಡರೆ, ಆ ನೈತಿಕ ನಿಲುವಿನ ವಿಶ್ವಾಸಾರ್ಹತೆ ಕುಸಿಯುತ್ತದೆ. ಜನರು ಸಹಜವಾಗಿಯೇ ಕಾಂಗ್ರೆಸ್‍ನ ಹಿಂದಿನ ಆರೋಪಗಳನ್ನೂ ಇದೇ ಮಾನದಂಡದಲ್ಲಿ ಅಳೆಯಲು ಆರಂಭಿಸುತ್ತಾರೆ.

ನಾಗೇಂದ್ರ ಅವರು ತಮ್ಮ ವಿರುದ್ಧದ ಕ್ರಮಕ್ಕೆ ತಾವು ದಲಿತ ಸಮುದಾಯಕ್ಕೆ ಸೇರಿದವರಾಗಿರುವುದೇ ಕಾರಣ ಎಂದು ಹೇಳುವುದು ಕೂಡ ಗಂಭೀರ ಪ್ರಶ್ನೆ ಎಬ್ಬಿಸುತ್ತದೆ. ಸಾಮಾಜಿಕವಾಗಿ ಹಿಂದುಳಿದ ಸಮುದಾಯದ ನಾಯಕನಾಗಿರುವುದು ಗೌರವದ ವಿಚಾರ; ಆದರೆ ಅದು ಭ್ರಷ್ಟಾಚಾರದ ಆರೋಪಗಳಿಂದ ರಕ್ಷಣೆಯನ್ನು ನೀಡುವ ಕವಚವಾಗಲು ಸಾಧ್ಯವೇ? ದಲಿತ ನಾಯಕನಾದ ಮಾತ್ರಕ್ಕೆ ಭ್ರಷ್ಟಾಚಾರ ಮಾಡಲು ವಿಶೇಷ ವಿನಾಯಿತಿ ಸಿಗುತ್ತದೆಯೇ? ವಾಲ್ಮೀಕಿ ನಿಗಮದಲ್ಲಿ ನೂರಾರು ಕೋಟಿ ರೂಪಾಯಿಗಳ ದುರುಪಯೋಗದ ಆರೋಪಗಳು ಮತ್ತು ತನಿಖೆಯಲ್ಲಿ ಹೊರಬಂದ ಸಾಕ್ಷ್ಯಗಳಿರುವಾಗ, ಚರ್ಚೆಯನ್ನು ಜಾತಿಯ ವಿಚಾರಕ್ಕೆ ತಿರುಗಿಸುವ ಬದಲು ಸಾಕ್ಷ್ಯಾಧಾರಗಳಿಗೆ ಉತ್ತರಿಸುವುದು ಹೆಚ್ಚು ಸೂಕ್ತ.

ಇದು ಕಾಂಗ್ರೆಸ್‍ಗೆ ಅತ್ಯಂತ ಅಪಾಯಕಾರಿ ದ್ವಂದ್ವ ಮಾನದಂಡದ ಚಿತ್ರಣ ನೀಡುತ್ತದೆ. ವಿರೋಧ ಪಕ್ಷದಲ್ಲಿದ್ದಾಗ ಭ್ರಷ್ಟಾಚಾರ ನೈತಿಕ ಪ್ರಶ್ನೆ; ಅಧಿಕಾರದಲ್ಲಿದ್ದಾಗ ಅದು ರಾಜಕೀಯ ಲೆಕ್ಕಾಚಾರ ಎಂಬ ಭಾವನೆ ಮೂಡುತ್ತದೆ. ಅಧಿಕಾರ ಉಳಿಸಿಕೊಳ್ಳಲು ರಾಜಕೀಯ ಸಮೀಕರಣಗಳು ಮುಖ್ಯವಾಗಬಹುದು; ಆದರೆ ಜನರ ವಿಶ್ವಾಸ ಕಳೆದುಕೊಂಡರೆ ಅದರ ಬೆಲೆ ಇನ್ನಷ್ಟು ದೊಡ್ಡದು. ನಾಗೇಂದ್ರ ಅವರ ಪುನರ್‍ಸೇರ್ಪಡೆ ಕೇವಲ ಒಬ್ಬ ಸಚಿವನ ನೇಮಕವಲ್ಲ; ಕಾಂಗ್ರೆಸ್‍ನ ಭ್ರಷ್ಟಾಚಾರ ವಿರೋಧಿ ನಿಲುವಿನ ನಿಜವಾದ ಪರೀಕ್ಷೆಯಾಗಿದೆ.