ಮಂತ್ರಿಗಳ ಬಾಯಿಗೆ ಬೀಗ ಹಾಕುವ ಸಮಯ ಬಂದಿದೆ

 ಸಚಿವ ಸಂಪುಟವೋ, ಮಾತಿನ ಮಲ್ಲರ ವೇದಿಕೆಯೋ?

...........

ನೇರ-ನಿಷ್ಠುರ * ಬಿವಿಸೀ

ಸರ್ಕಾರದ ಯಶಸ್ಸನ್ನು ಅದರ ಯೋಜನೆಗಳು ಮಾತ್ರ ನಿರ್ಧರಿಸುವುದಿಲ್ಲ; ಅದರ ಪರವಾಗಿ ಯಾರು, ಯಾವಾಗ, ಏನು ಮಾತನಾಡುತ್ತಾರೆ ಎಂಬುದೂ ಅಷ್ಟೇ ಮುಖ್ಯ. ದುರದೃಷ್ಟವಶಾತ್, ಕರ್ನಾಟಕ ಸರ್ಕಾರದಲ್ಲಿ ಇಂದು ಕಾಣುತ್ತಿರುವ ಚಿತ್ರಣವೇ ಬೇರೆ. ಯಾವ ವಿಷಯ ಬಂದರೂ ಒಬ್ಬೊಬ್ಬ ಸಚಿವರು ತಮ್ಮ ಇಲಾಖೆಗೆ ಸಂಬಂಧವಿರಲಿ, ಇರದಿರಲಿ ಹೇಳಿಕೆ ನೀಡುತ್ತಾರೆ. ಪರಿಣಾಮ - ಸರ್ಕಾರಕ್ಕೆ ಒಂದೇ ಧ್ವನಿ ಎಂಬ ಭಾವನೆ ಕಣ್ಮರೆಯಾಗಿ, ಗೊಂದಲ, ಪರಸ್ಪರ ವಿರೋಧಾಭಾಸ ಮತ್ತು ಸಾರ್ವಜನಿಕರಲ್ಲಿ ಗಂಭೀರ ಅನುಮಾನಗಳು ಮೂಡುತ್ತಿವೆ.

ಸಚಿವ ಸಂಪುಟ ಎನ್ನುವುದು ಚರ್ಚಾ ವೇದಿಕೆಯಲ್ಲ; ಅದು ಆಡಳಿತದ ಅತ್ಯುನ್ನತ ಕಾರ್ಯನಿರ್ವಹಣಾ ಸಂಸ್ಥೆ. ಸಚಿವರು ತಮ್ಮ ಇಲಾಖೆಯ ಕಾರ್ಯ, ಸಾಧನೆ ಮತ್ತು ನೀತಿಗಳ ಬಗ್ಗೆ ಮಾತನಾಡುವುದು ಸಹಜ. ಆದರೆ ಸರ್ಕಾರದ ಸಮಗ್ರ ನೀತಿಗಳು, ಸೂಕ್ಷ್ಮ ರಾಜಕೀಯ ವಿಷಯಗಳು ಅಥವಾ ಇತರ ಇಲಾಖೆಗಳ ವಿಚಾರಗಳಲ್ಲಿ ಮಾತನಾಡುವುದು ಮುಖ್ಯಮಂತ್ರಿ ಅಥವಾ ಸರ್ಕಾರದಿಂದ ಅಧಿಕೃತವಾಗಿ ನಿಯೋಜಿಸಲ್ಪಟ್ಟ ವಕ್ತಾರರ ಹೊಣೆಗಾರಿಕೆ. ಈ ಸರಳ ಆಡಳಿತ ಶಿಸ್ತೇ ಕರ್ನಾಟಕದಲ್ಲಿ ಮಾಯವಾಗಿದೆ.

ಸಚಿವರಾದ ಸತೀಶ ಜಾರಕಿಹೊಳಿ, ಯತೀಂದ್ರ ಸಿದ್ದರಾಮಯ್ಯ, ರಾಮಲಿಂಗಾ ರೆಡ್ಡಿ ಮತ್ತು ಯು ಟಿ ಖಾದರ್ ಸೇರಿದಂತೆ ಕೆಲ ಸಚಿವರು ಇತ್ತೀಚಿನ ದಿನಗಳಲ್ಲಿ ತಮ್ಮ ಇಲಾಖೆಯ ವ್ಯಾಪ್ತಿಯನ್ನು ಮೀರಿ ವಿವಿಧ ರಾಜಕೀಯ ಹಾಗೂ ಆಡಳಿತಾತ್ಮಕ ವಿಷಯಗಳ ಬಗ್ಗೆ ನಿರಂತರವಾಗಿ ಪ್ರತಿಕ್ರಿಯಿಸುತ್ತಿದ್ದಾರೆ. ಅವರ ಹೇಳಿಕೆಗಳು ವೈಯಕ್ತಿಕ ಅಭಿಪ್ರಾಯವೋ, ಸರ್ಕಾರದ ಅಧಿಕೃತ ನಿಲುವೋ ಎಂಬ ಗೊಂದಲ ಜನರಲ್ಲಿ ಉಂಟಾಗುತ್ತಿದೆ. ಸರ್ಕಾರದಲ್ಲಿ ಎಲ್ಲ ಸಚಿವರೂ ವಕ್ತಾರರಲ್ಲ ಎಂಬ ಕನಿಷ್ಠ ಅರಿವಾದರೂ ಇರಬೇಕು.

ಕೆಲವರಿಗೆ ಆಡಳಿತಕ್ಕಿಂತ ಸುದ್ದಿಯಲ್ಲಿರುವುದೇ ಮುಖ್ಯ ಗುರಿಯಾಗಿರುವಂತೆ ಕಾಣುತ್ತದೆ. ಪ್ರತಿದಿನವೂ ಯಾವುದಾದರೂ ಒಂದು ಹೇಳಿಕೆ ನೀಡಿದರೆ ಮಾತ್ರ ರಾಜಕೀಯವಾಗಿ ಬದುಕಿದ್ದೇವೆ ಎಂಬ ಭ್ರಮೆ ಅವರಲ್ಲಿ ಬೆಳೆದಂತಿದೆ. ಆದರೆ ಪ್ರಚಾರದಿಂದ ಆಡಳಿತ ನಡೆಯುವುದಿಲ್ಲ. ಕೆಲಸದಿಂದ ಮಾತ್ರ ಸರ್ಕಾರದ ಗೌರವ ಹೆಚ್ಚುತ್ತದೆ. ಬೇಜವಾಬ್ದಾರಿಯ ಹೇಳಿಕೆಗಳು ಕ್ಷಣಿಕ ಸುದ್ದಿಯಾಗಬಹುದು; ಆದರೆ ಸರ್ಕಾರದ ವಿಶ್ವಾಸಾರ್ಹತೆಗೆ ಶಾಶ್ವತ ಹಾನಿ ಉಂಟುಮಾಡುತ್ತವೆ.

ಇಂತಹ ಪರಿಸ್ಥಿತಿಯಲ್ಲಿ ಜನರು ಸಹಜವಾಗಿಯೇ ಪ್ರಶ್ನಿಸುತ್ತಾರೆ - ಸರ್ಕಾರದ ನಿಜವಾದ ನಿಲುವು ಯಾವುದು? ಒಬ್ಬ ಸಚಿವರದ್ದೇನಾ? ಮತ್ತೊಬ್ಬರದ್ದೇನಾ? ಇಲ್ಲವೇ ಮುಖ್ಯಮಂತ್ರಿಯದ್ದೇನಾ? ಈ ಗೊಂದಲವನ್ನು ಪ್ರತಿಪಕ್ಷಗಳು ರಾಜಕೀಯವಾಗಿ ಬಳಸಿಕೊಳ್ಳುವುದು ಸಹಜ. ಅಧಿಕಾರಿಗಳಿಗೂ ಯಾವ ಹೇಳಿಕೆಯನ್ನು ಅಧಿಕೃತ ನಿರ್ದೇಶನವೆಂದು ಪರಿಗಣಿಸಬೇಕು ಎಂಬ ಸಂದೇಹ ಉಂಟಾಗುತ್ತದೆ. ಆಡಳಿತದಲ್ಲಿ ಇದಕ್ಕಿಂತ ದೊಡ್ಡ ಅವ್ಯವಸ್ಥೆ ಮತ್ತೊಂದಿಲ್ಲ.

ಈ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರದ ಸಚಿವ ಸಂಪುಟದ ಕಾರ್ಯವೈಖರಿ ಗಮನಾರ್ಹವಾಗಿದೆ. ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಸಚಿವರು ಸಾಮಾನ್ಯವಾಗಿ ತಮ್ಮ ಇಲಾಖೆಯ ಹೊರತಾದ ವಿಷಯಗಳಲ್ಲಿ ಅನಗತ್ಯ ಹೇಳಿಕೆಗಳನ್ನು ನೀಡುವುದಿಲ್ಲ. ಸರ್ಕಾರದ ಸಂದೇಶ ಒಂದೇ ಧ್ವನಿಯಲ್ಲಿ ಹೊರಬರಬೇಕು ಎಂಬ ಶಿಸ್ತು ಅಲ್ಲಿ ಕಾಣುತ್ತದೆ. ಸರ್ಕಾರದ ನೀತಿಗಳ ಬಗ್ಗೆ ಭಿನ್ನಾಭಿಪ್ರಾಯಗಳಿರಬಹುದು; ಆದರೆ ಸಂವಹನದ ಶಿಸ್ತಿನ ವಿಷಯದಲ್ಲಿ ಕೇಂದ್ರ ಸಚಿವ ಸಂಪುಟದಿಂದ ಕಲಿಯಬೇಕಾದ ಪಾಠ ಕರ್ನಾಟಕ ಸರ್ಕಾರಕ್ಕೆ ಇದೆ.

ಮುಖ್ಯಮಂತ್ರಿ ಡಿ ಕೆ ಶಿವಕುಮಾರ್ ಈ ಬೆಳವಣಿಗೆಯನ್ನು ಗಂಭೀರವಾಗಿ ಪರಿಗಣಿಸಬೇಕಾಗಿದೆ. ಸಚಿವರು ಮನಬಂದಂತೆ ಮಾತನಾಡುವುದನ್ನು ಮೌನವಾಗಿ ನೋಡುವುದು ನಾಯಕತ್ವವಲ್ಲ. ಯಾರು ಯಾವ ವಿಷಯದಲ್ಲಿ ಮಾತನಾಡಬೇಕು, ಯಾರು ಮಾತನಾಡಬಾರದು ಎಂಬ ಸ್ಪಷ್ಟ ಮಾರ್ಗಸೂಚಿಯನ್ನು ಜಾರಿಗೊಳಿಸುವ ಜವಾಬ್ದಾರಿ ಅವರದ್ದೇ. ಸಚಿವರು ತಮ್ಮ ಇಲಾಖೆಯ ಕೆಲಸದಲ್ಲಿ ಹೆಚ್ಚು ತೊಡಗಿಸಿಕೊಳ್ಳಬೇಕು; ಮಾಧ್ಯಮಗಳಲ್ಲಿ ಪ್ರತಿದಿನ ಕಾಣಿಸಿಕೊಳ್ಳುವುದೇ ಸಾಧನೆ ಎಂಬ ಮನೋಭಾವವನ್ನು ಬಿಟ್ಟುಬಿಡಬೇಕು.

`ಹೆಚ್ಚು ಕೆಲಸ ಮಾಡಿ, ಕಡಿಮೆ ಮಾತನಾಡಿ; ಅಥಾರಿಟಿಯಿಲ್ಲದೇ ಸರ್ಕಾರದ ಪರವಾಗಿ ಮಾತನಾಡಬೇಡಿ' - ಈ ಒಂದೇ ಸಂದೇಶವನ್ನು ಮುಖ್ಯಮಂತ್ರಿ ತಮ್ಮ ಸಂಪುಟಕ್ಕೆ ನೀಡಬೇಕಾದ ಸಮಯ ಬಂದಿದೆ. ಶಿಸ್ತುಬದ್ಧ ಸಚಿವ ಸಂಪುಟ ಸರ್ಕಾರದ ಗೌರವವನ್ನು ಹೆಚ್ಚಿಸುತ್ತದೆ. ಮಾತಿನ ಮಿತಿಯಿಲ್ಲದ ಬಾಯಿ ಬಡಿದುಕೊಳ್ಳುವ ಸಚಿವರು  ಸರ್ಕಾರದ ವಿಶ್ವಾಸವನ್ನು ಕುಗ್ಗಿಸುತ್ತಾರೆ. ಕರ್ನಾಟಕಕ್ಕೆ ಇಂದು ಬೇಕಾಗಿರುವುದು ಸುದ್ದಿಯಲ್ಲಿರುವ ಸಚಿವರಲ್ಲ; ಸುಶಾಸನ ನೀಡುವ ಸಚಿವರು.