ಬಿಜೆಪಿ ಉಳಿಯಬೇಕಾದರೆ ವಿಜಯೇಂದ್ರ ಹೋಗಲೇಬೇಕು

 ಖರೇ ಹೇಳಬೇಕೆಂದ್ರೆ * ಬಿವಿಸೀ

ಕರ್ನಾಟಕ ಬಿಜೆಪಿಯ ಇಂದಿನ ದೊಡ್ಡ ಸಂಕಷ್ಟ ಕಾಂಗ್ರೆಸ್ ಅಲ್ಲ; ತನ್ನದೇ ನಾಯಕತ್ವ. ರಾಜ್ಯ ಘಟಕದ ಅಧ್ಯಕ್ಷ ಬಿ ವೈ ವಿಜಯೇಂದ್ರ ಅವರು ತಮ್ಮದೇ ಪಕ್ಷದ ಕೆಲವು ನಾಯಕರು ತಮ್ಮ ವಿರುದ್ಧ ಸಂಚು ರೂಪಿಸುತ್ತಿದ್ದಾರೆ ಎಂದು ಸಾರ್ವಜನಿಕವಾಗಿ ಹೇಳಿರುವುದು ಕೇವಲ ಒಂದು ಹೇಳಿಕೆಯಲ್ಲ, ಪಕ್ಷದ ಆಂತರಿಕ ವೈಫಲ್ಯದ ಬಹಿರಂಗ ಒಪ್ಪಿಗೆಯಾಗಿದೆ.

ಸಂಚು ನಿಜವೇ, ಸುಳ್ಳೇ ಎಂಬುದು ಇಲ್ಲಿ ಮುಖ್ಯವಲ್ಲ. ಒಂದು ರಾಜ್ಯ ಘಟಕದ ಅಧ್ಯಕ್ಷನು ತನ್ನ ಸಂಘಟನೆಯನ್ನು ಒಗ್ಗೂಡಿಸುವ ಜವಾಬ್ದಾರಿ ಹೊಂದಿರುತ್ತಾನೆ; ತನ್ನದೇ ಪಕ್ಷದ ಒಳಜಗಳವನ್ನು ಪತ್ರಿಕೆಗಳ ಮುಂದೆ ಬಿಚ್ಚಿಡುವ ಜವಾಬ್ದಾರಿ ಅಲ್ಲ.

ಯಾವುದೇ ರಾಜಕೀಯ ಪಕ್ಷದಲ್ಲಿ ಭಿನ್ನಾಭಿಪ್ರಾಯಗಳು, ಗುಂಪುಗಾರಿಕೆ ಇರುವುದು ಹೊಸ ವಿಷಯವಲ್ಲ. ಆದರೆ ಅವುಗಳನ್ನು ಸಂಘಟನೆಯೊಳಗೆ ಬಗೆಹರಿಸುವ ಸಾಮಥ್ರ್ಯವೇ ನಾಯಕತ್ವದ ನಿಜವಾದ ಪರೀಕ್ಷೆ. ಅಧ್ಯಕ್ಷನೇ ತನ್ನ ವಿರುದ್ಧ ಷಡ್ಯಂತ್ರ ನಡೆಯುತ್ತಿದೆ ಎಂದು ಸಾರ್ವಜನಿಕವಾಗಿ ದೂರಿದರೆ, ಆತ ತನ್ನ ಪಕ್ಷದ ಮೇಲಿನ ಹಿಡಿತವನ್ನೇ ಕಳೆದುಕೊಂಡಿದ್ದಾನೆ ಎಂಬ ಸಂದೇಶ ಕಾರ್ಯಕರ್ತರಿಗೆ ಮತ್ತು ಮತದಾರರಿಗೆ ಹೋಗುತ್ತದೆ. ಇದು ವ್ಯಕ್ತಿಯ ವೈಫಲ್ಯವಲ್ಲ; ಇಡೀ ಪಕ್ಷದ ಪ್ರತಿಷ್ಠೆಗೆ ಬಿದ್ದ ಪೆಟ್ಟು.

ವಿಜಯೇಂದ್ರ ಅವರ ಹೇಳಿಕೆಗೆ ಬಿಜೆಪಿಯೊಳಗೇ ತೀವ್ರ ವಿರೋಧ ವ್ಯಕ್ತವಾಗಿದೆ. ಹಿರಿಯ ನಾಯಕರು ಬಹಿರಂಗವಾಗಿ ಅವರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಮಾಜಿ ಮುಖ್ಯಮಂತ್ರಿ ಡಿ ವಿ ಸದಾನಂದ ಗೌಡ ಅವರು ವಿಜಯೇಂದ್ರ ಅವರನ್ನು ಅಧ್ಯಕ್ಷ ಸ್ಥಾನದಿಂದಲೇ ಕೆಳಗಿಳಿಸಬೇಕು ಎಂದು ಆಗ್ರಹಿಸಿದ್ದಾರೆ. ಇದು ಸಾಮಾನ್ಯ ಅಸಮಾಧಾನವಲ್ಲ; ರಾಜ್ಯ ನಾಯಕತ್ವದ ಮೇಲಿನ ವಿಶ್ವಾಸವೇ ಕುಸಿದಿದೆ ಎಂಬುದರ ಸ್ಪಷ್ಟ ಸಂಕೇತ.

ಈ ಬೆಳವಣಿಗೆ ಬಿಜೆಪಿಯ ದ್ವಂದ್ವ ನಿಲುವನ್ನೂ ಮತ್ತೆ ಬಯಲಿಗೆಳೆಯುತ್ತದೆ. ಕುಟುಂಬ ರಾಜಕಾರಣದ ವಿರುದ್ಧ ದಶಕಗಳಿಂದ ಹೋರಾಟ ನಡೆಸುತ್ತಿರುವುದಾಗಿ ಹೇಳಿಕೊಂಡಿರುವ ಇದೇ ಬಿಜೆಪಿ, ತನ್ನ ನಾಯಕ ಯಡಿಯೂರಪ್ಪ ಅವರ ಪುತ್ರನನ್ನೇ ರಾಜ್ಯಾಧ್ಯಕ್ಷನನ್ನಾಗಿ ನೇಮಿಸಿತು. ಕಾಂಗ್ರೆಸ್ ಮತ್ತು ಇತರ ಪಕ್ಷಗಳನ್ನು ವಂಶಪಾರಂಪರ್ಯ ರಾಜಕಾರಣಕ್ಕಾಗಿ ಟೀಕಿಸುವ ಪಕ್ಷವೇ, ತನ್ನ ವಿಷಯ ಬಂದಾಗ ಬೇರೆ ಮಾನದಂಡ ಅನುಸರಿಸಿದೆ. ಇದಕ್ಕಿಂತ ದೊಡ್ಡ ವೈರುಧ್ಯ ಇನ್ನೇನು ಬೇಕು?

ಯಡಿಯೂರಪ್ಪ ಕುಟುಂಬದ ಸುತ್ತಲಿನ ವಿವಾದಗಳೂ ಬಿಜೆಪಿಗೆ ಮುಜುಗರ ಉಂಟುಮಾಡುತ್ತಿವೆ. ತಮ್ಮ ತಂದೆಯ ವಿರುದ್ಧ ಡಝನ್‍ಗಟ್ಟಳೆ ಕ್ರಿಮಿನಲ್ ಪ್ರಕರಣಗಳು ನ್ಯಾಯಾಲಯಗಳಲ್ಲಿ ಬಾಕಿ ಇವೆ ಎಂಬುದನ್ನು ವಿಜಯೇಂದ್ರ ಅವರೇ ಒಪ್ಪಿಕೊಂಡಿದ್ದಾರೆ. ಯಡಿಯೂರಪ್ಪ ಅವರು ಭ್ರಷ್ಟಾಚಾರ ಆರೋಪಗಳಿಗೆ ಸಂಬಂಧಿಸಿದ ಪ್ರಕರಣಗಳಲ್ಲಿ ನ್ಯಾಯಾಂಗ ಬಂಧನವನ್ನೂ ಅನುಭವಿಸಿದ್ದರು. ಅವರ ವಿರುದ್ಧ ಪೆÇಕ್ಸೊ ಪ್ರಕರಣವೂ ನ್ಯಾಯಾಲಯದಲ್ಲಿ ವಿಚಾರಣೆಯಲ್ಲಿದೆ. ವಿಜಯೇಂದ್ರ ಅವರ ಮೇಲೂ ಭೂ ಹಗರಣ ಹಾಗೂ ಭ್ರಷ್ಟಾಚಾರದ ಆರೋಪಗಳು ಕೇಳಿಬಂದಿವೆ. ಇವೆಲ್ಲವೂ ನ್ಯಾಯಾಲಯದ ವ್ಯಾಪ್ತಿಯಲ್ಲಿರುವ ವಿಷಯಗಳಾಗಿದ್ದು, ಅಂತಿಮ ತೀರ್ಪು ಬರುವವರೆಗೆ ಯಾರನ್ನೂ ಅಪರಾಧಿ ಎಂದು ಕರೆಯಲಾಗುವುದಿಲ್ಲ. ಆದರೆ ಸಾರ್ವಜನಿಕ ಜೀವನದಲ್ಲಿ ಕಾನೂನು ಹೊಣೆಗಾರಿಕೆಯಷ್ಟೇ ರಾಜಕೀಯ ನೈತಿಕತೆಯೂ ಮಹತ್ವದ್ದಾಗಿದೆ. ಪಕ್ಷದ ನಾಯಕರ ಬಗ್ಗೆ ಜನರ ಗ್ರಹಿಕೆ ಏನು ಎಂಬುದೂ ಅಷ್ಟೇ ಮುಖ್ಯ. 

ಇದಕ್ಕೆ ಮತ್ತೊಂದು ಆಯಾಮವೂ ಸೇರಿದೆ. ಆಡಳಿತಾರೂಢ ಕಾಂಗ್ರೆಸ್ ನಾಯಕರೊಂದಿಗೆ ವಿಜಯೇಂದ್ರ ಅವರು ಹೊಂದಾಣಿಕೆಯ ರಾಜಕಾರಣ ನಡೆಸುತ್ತಿದ್ದಾರೆ ಎಂಬ ಆರೋಪಗಳು ಬಿಜೆಪಿಯೊಳಗೇ ಕೇಳಿಬರುತ್ತಿವೆ. ಅವು ಸಾಬೀತಾಗಿರಲಿ ಅಥವಾ ಇಲ್ಲದಿರಲಿ, ಇಂತಹ ಅನುಮಾನಗಳು ಸ್ವಪಕ್ಷದೊಳಗೇ ಬಲವಾಗಿ ವ್ಯಕ್ತವಾಗುತ್ತಿರುವುದು ಅಧ್ಯಕ್ಷರ ವಿಶ್ವಾಸಾರ್ಹತೆಯನ್ನೇ ಪ್ರಶ್ನಿಸುತ್ತದೆ.

ನಾಯಕತ್ವ ಎನ್ನುವುದು ಹುದ್ದೆಯಿಂದ ಉಳಿಯುವುದಲ್ಲ; ವಿಶ್ವಾಸದಿಂದ ಉಳಿಯುವುದು. ಹಿರಿಯ ನಾಯಕರು ವಿರೋಧಿಸುತ್ತಿರುವಾಗ, ಕಾರ್ಯಕರ್ತರಲ್ಲಿ ಗೊಂದಲ ಮನೆ ಮಾಡಿರುವಾಗ, ಅಧ್ಯಕ್ಷರು ತಮ್ಮ ಸ್ಥಾನವನ್ನು ಸಮರ್ಥಿಸಿಕೊಳ್ಳುವ ಪರಿಸ್ಥಿತಿಯಲ್ಲಿದ್ದರೆ, ಅವರು ಪಕ್ಷವನ್ನು ಮುನ್ನಡೆಸುವ ನೈತಿಕ ಅಧಿಕಾರವನ್ನೇ ಕಳೆದುಕೊಳ್ಳುತ್ತಾರೆ.

ಈ ಹಂತದಲ್ಲಿ ವಿಜಯೇಂದ್ರ ಅವರು ಗೌರವಯುತವಾಗಿ ರಾಜ್ಯಾಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡುವುದು ಬಿಜೆಪಿಗೂ, ಅವರಿಗೂ ಉತ್ತಮ ಮಾರ್ಗ. ಕರ್ನಾಟಕ ಬಿಜೆಪಿಯಲ್ಲಿ ಸಂಘಟನೆಯನ್ನು ಪುನಃ ಕಟ್ಟಬಲ್ಲ ಅನುಭವಿಗಳೂ, ಸಮರ್ಥರೂ ಆಗಿರುವ ಅನೇಕ ನಾಯಕರು ಇದ್ದಾರೆ. ಅವರಿಗೆ ಅವಕಾಶ ನೀಡುವುದು ಪಕ್ಷದ ಭವಿಷ್ಯದ ಹಿತದೃಷ್ಟಿಯಿಂದ ಅಗತ್ಯ.

ಬಿಜೆಪಿ ನಿಜವಾಗಿಯೂ ಆಂತರಿಕ ಪ್ರಜಾಪ್ರಭುತ್ವ, ಅರ್ಹತೆ ಮತ್ತು ಹೊಣೆಗಾರಿಕೆಯನ್ನು ನಂಬುವುದಾದರೆ, ಅದನ್ನು ಸಾಬೀತುಪಡಿಸಬೇಕಾದ ಕ್ಷಣ ಇದೇ. ವಿವಾದಗಳ ಕೇಂದ್ರಬಿಂದುವಾಗಿರುವ ನಾಯಕನನ್ನು ಒಂದು ದಿನವೂ ಹುದ್ದೆಯಲ್ಲಿ ಮುಂದುವರಿಸುವುದು ಪಕ್ಷಕ್ಕೆ ರಾಜಕೀಯವಾಗಿ ದುಬಾರಿಯಾಗಲಿದೆ. ಕರ್ನಾಟಕದಲ್ಲಿ ಬಲಿಷ್ಠ ವಿರೋಧ ಪಕ್ಷ ಬೇಕಾದರೆ, ಮೊದಲು ಬಿಜೆಪಿಗೆ ಬಲಿಷ್ಠ, ವಿಶ್ವಾಸಾರ್ಹ ಮತ್ತು ಎಲ್ಲರನ್ನೂ ಒಗ್ಗೂಡಿಸಬಲ್ಲ ನಾಯಕತ್ವ ಬೇಕು.