ಆಡಳಿತದಲ್ಲಿ ಜವಾಬ್ದಾರಿಯ ಪತನ: ರಾಜಕೀಯ ಅನೈತಿಕತೆಯ ಪ್ರಪಾತಕ್ಕೆ ಪ್ರಜಾಪ್ರಭುತ್ವದ ಕುಸಿತ!

 ಇದ್ದುದು ಇದ್ದಹಾಗೆ * ಬಿವಿಸೀ

ಪ್ರಜಾಪ್ರಭುತ್ವ ಎಂಬುದು ಕೇವಲ ಮತದಾನದ ಪ್ರಕ್ರಿಯೆಯಲ್ಲ; ಅದು ನಂಬಿಕೆ, ನೈತಿಕ ನೆಲೆಗಟ್ಟು ಮತ್ತು ಸಾಂಸ್ಥಿಕ ಜವಾಬ್ದಾರಿಯ ಮೇಲೆ ನಿರ್ಮಾಣವಾಗಿರುವ ಒಂದು ಸಾಮಾಜಿಕ ಒಪ್ಪಂದ. ಪ್ರತಿ ಐದು ವರ್ಷಕ್ಕೊಮ್ಮೆ ಸಾರ್ವಭೌಮ ಅಧಿಕಾರವನ್ನು ಪಡೆದ ತಕ್ಷಣ, ಆಡಳಿತಗಾರರು ತಮಗೆ ತೋಚಿದ್ದನ್ನು ಮಾಡಲು ಸಿಕ್ಕ ಪರವಾನಗಿ ಇದಲ್ಲ. ಆದರೆ, ಇಂದಿನ ಸಮಕಾಲೀನ ರಾಜಕೀಯ ವ್ಯವಸ್ಥೆಯು ಅತ್ಯಂತ ಅಸಹ್ಯಕರವಾದ ಮ್ಯೂಸಿಕಲ್ ಚೇರ್ ಆಟವಾಗಿ ಮಾರ್ಪಟ್ಟಿದೆ. ಇಲ್ಲಿ ನೈತಿಕತೆಯನ್ನು ರಾಜಕೀಯ ಅಸ್ತ್ರವನ್ನಾಗಿ ಬಳಸಲಾಗುತ್ತಿದೆಯೇ ಹೊರತು, ಆಡಳಿತದ ಮಾನದಂಡವಾಗಿ ಅಲ್ಲ. ಅಧಿಕಾರದಲ್ಲಿರುವ ಪಕ್ಷವು ತನಗೆ ಸಂಪೂರ್ಣ ಹಕ್ಕು ಇದೆ ಎಂಬಂತೆ ವರ್ತಿಸಿದರೆ, ವಿರೋಧ ಪಕ್ಷಗಳು ಕೇವಲ ವಿರೋಧಿಸುವುದೇ ತಮ್ಮ ಏಕೈಕ ಕರ್ತವ್ಯ ಎಂದು ಭಾವಿಸಿವೆ.

ಸರ್ಕಾರದ ವೈಫಲ್ಯಗಳು, ಹಗರಣಗಳು ಮತ್ತು ತಪ್ಪುಗಳು ಬಯಲಿಗೆ ಬಂದಾಗ, ಆಡಳಿತ ಪಕ್ಷಗಳು ತಮ್ಮ ನಿರಪರಾಧಿತ್ವವನ್ನು ಸಾಬೀತುಪಡಿಸಲು ಪ್ರಯತ್ನಿಸುವುದಿಲ್ಲ. ಬದಲಾಗಿ, "ಹಿಂದೆ ನೀವೂ ಇದನ್ನೇ ಮಾಡಿದ್ದೀರಿ" ಎಂಬ ವಾಟ್-ಅಬೌಟಿಸಂ ವಾದವನ್ನು ಮುಂದಿಡುತ್ತವೆ. ಈ ಕೆಟ್ಟ ಸ್ಪರ್ಧೆಯಿಂದಾಗಿ, ಇವತ್ತು ಯಾವುದೇ ಪಕ್ಷಕ್ಕೂ ನಿಯಮಗಳಾಗಲಿ, ನೈತಿಕತೆಯಾಗಲಿ ಅನ್ವಯಿಸುತ್ತಿಲ್ಲ.

ರಾಜಕೀಯ ನಡವಳಿಕೆಯಲ್ಲಿನ ಈ ದ್ವಂದ್ವ ನೀತಿಯನ್ನು ಗಮನಿಸಿ. ಹಿಂದೆ ಬಿಜೆಪಿ ವಿರೋಧ ಪಕ್ಷದಲ್ಲಿದ್ದಾಗ, ಸಣ್ಣಪುಟ್ಟ ತಪ್ಪುಗಳಿಗೂ ಕೇಂದ್ರ ಸಚಿವರ ರಾಜೀನಾಮೆಗೆ ಆಗ್ರಹಿಸಿ ಸಂಸತ್ತನ್ನು ಸ್ಥಗಿತಗೊಳಿಸುತ್ತಿತ್ತು. ಆದರೆ ಇಂದು ದೇಶಾದ್ಯಂತ ಲಕ್ಷಾಂತರ ವಿದ್ಯಾರ್ಥಿಗಳ ಭವಿಷ್ಯವನ್ನು ಕತ್ತಲೆಗೆ ತಳ್ಳಿದ, ಇಡೀ ಶಿಕ್ಷಣ ವ್ಯವಸ್ಥೆಯನ್ನೇ ತಲೆತಗ್ಗಿಸುವಂತೆ ಮಾಡಿದ `ನೀಟ್' ಪ್ರಶ್ನೆ ಪತ್ರಿಕೆ ಸೋರಿಕೆ ಹಗರಣ ನಡೆದಿದ್ದರೂ, ಕೇಂದ್ರ ಸರ್ಕಾರ ಸಂಪೂರ್ಣ ಮೌನಕ್ಕೆ ಶರಣಾಗಿದೆ. `ಚಾರಿತ್ರ್ಯ ನಿರ್ಮಾಣ' ಮತ್ತು ಮೌಲ್ಯಾಧಾರಿತ ರಾಜಕೀಯದ ಮಾತುಗಳನ್ನಾಡುವ ಪಕ್ಷದಿಂದ ಇಂತಹ ಬೇಜವಾಬ್ದಾರಿತನವನ್ನು ಯಾರೂ ನಿರೀಕ್ಷಿಸಿರಲಿಲ್ಲ. ಒಂದು ಸಶಕ್ತ ಮತ್ತು ನೈತಿಕ ಪ್ರಜಾಪ್ರಭುತ್ವದಲ್ಲಿ, ಇಷ್ಟೊಂದು ದೊಡ್ಡ ಆಡಳಿತಾತ್ಮಕ ವೈಫಲ್ಯ ಸಂಭವಿಸಿದಾಗ ಉನ್ನತ ಮಟ್ಟದ ನಾಯಕರ ತಲೆಗಳು ಉರುಳಬೇಕಿತ್ತು. ಆದರೆ ಇಲ್ಲಿ ಸಚಿವರನ್ನು ರಕ್ಷಿಸಲಾಗುತ್ತಿದೆ.

ಈ ನೈತಿಕ ಅಧಃಪತನ ಕೇವಲ ಕೇಂದ್ರಕ್ಕೆ ಸೀಮಿತವಾಗಿಲ್ಲ; ರಾಜ್ಯಗಳಲ್ಲೂ ಇದೇ ಪರಿಸ್ಥಿತಿ ಇದೆ. ಸಾಲು ಸಾಲು ಹಗರಣಗಳು ಬಯಲಾಗುತ್ತಿದ್ದರೂ, ಸರ್ಕಾರದ ಅಸ್ತಿತ್ವಕ್ಕೆ ಧಕ್ಕೆ ಬರುವವರೆಗೂ ಸಚಿವರನ್ನು ಸಮರ್ಥಿಸಿಕೊಳ್ಳಲಾಗುತ್ತದೆ. ಮುಖ್ಯಮಂತ್ರಿಗಳು ಸಹ ತಮ್ಮ ರಾಜಕೀಯ ಉಳಿವಿಗಾಗಿ ಭ್ರಷ್ಟಾಚಾರದ ಕಡೆಗೆ ಕಣ್ಣು ಮುಚ್ಚಿ ಕುಳಿತುಕೊಳ್ಳುತ್ತಿದ್ದಾರೆ.

ಉತ್ತಮ ಆಡಳಿತ, ನೈತಿಕತೆ ಮತ್ತು ಜವಾಬ್ದಾರಿ ಇಲ್ಲದ ಪ್ರಜಾಪ್ರಭುತ್ವವು ಕೇವಲ ಒಂದು ಜೀವವಿಲ್ಲದ ಅಸ್ಥಿಪಂಜರ. ನಾವು ರಾಜಕೀಯ ಹಿತಾಸಕ್ತಿಗಾಗಿ ಮೌಲ್ಯಗಳನ್ನು ಬಲಿ ಕೊಡುತ್ತಿರುವುದರಿಂದ ದಿನದಿಂದ ದಿನಕ್ಕೆ ಪ್ರಪಾತಕ್ಕೆ ಕುಸಿಯುತ್ತಿದ್ದೇವೆ. ಆದರೆ, ರಾಜಕಾರಣಿಗಳು ಒಂದು ವಿಷಯವನ್ನು ನೆನಪಿನಲ್ಲಿಡಬೇಕು; ದೇಶದ ಜನರೇನು ಕುರುಡರಲ್ಲ, ಅವರು ಎಲ್ಲವನ್ನೂ ಸೂಕ್ಷ್ಮವಾಗಿ ಗಮನಿಸುತ್ತಿದ್ದಾರೆ. ಸಾರ್ವಜನಿಕರ ತಾಳ್ಮೆಯ ಕಟ್ಟೆ ಒಡೆದಾಗ, ಅವರು ಮತಗಟ್ಟೆಯ ಮೂಲಕ ತಪ್ಪು ಮಾಡಿದ ರಾಜಕೀಯ ಆಟಗಾರರಿಗೆ ಮರಣಶಾಸನ ಬರೆಯಲಿದ್ದಾರೆ. ಅಧಿಕಾರ ಎಂಬುದು ಕೇವಲ ಬಾಡಿಗೆಗೆ ಬಂದಿದೆಯೇ ಹೊರತು, ಅದು ಯಾರಿಗೂ ಶಾಶ್ವತ ಸ್ವತ್ತಲ್ಲ ಎಂಬುದನ್ನು ಮತದಾರರು ಶೀಘ್ರದಲ್ಲೇ ನೆನಪಿಸಲಿದ್ದಾರೆ.