ಹೆಗ್ಗಡೆಗಳ ವಿವಾದಗಳ ನಡುವೆ ಕೇಂದ್ರ ನಾಯಕರ ಬರ್ತಡೇ ಶುಭಾಶಯ ಬಿಂಬಿಸುವ ಸಂದೇಶ ಏನು?

 ಗಂಭೀರ ಆರೋಪಗಳು ಮತ್ತು ನಾಗರಿಕ ಸಮಾಜದ ಪ್ರಶ್ನೆಗಳ ನಡುವೆ ಪ್ರಧಾನಿ, ರಾಷ್ಟ್ರಪತಿ ಹಾಗೂ ಗೃಹಮಂತ್ರಿಗಳ ಶುಭಾಶಯಗಳು ನೀಡಿದ ಸಂದೇಶವು ಜವಾಬ್ದಾರಿಯ ರಾಜಕೀಯದ ಭರವಸೆಯನ್ನೇ ದುರ್ಬಲಗೊಳಿಸಿದೆ.

....

ಕರಾವಳಿ ಕರ್ನಾಟಕದ ರಾಜಕೀಯ ಮತ್ತು ಸಾಮಾಜಿಕ ವಾತಾವರಣದಲ್ಲಿ ವೀರೇಂದ್ರ ಹೆಗ್ಗಡೆಗೆ ಕೇಂದ್ರ ಮಟ್ಟದ ಬರ್ತಡೇ ಸಂದೇಶಗಳು ಬಂದ ಕ್ಷಣದಿಂದಲೇ ಹೊಸ  ಚರ್ಚೆಗಳು ಎದ್ದಿವೆ. ಇವು ಸಾಮಾನ್ಯ ಜನ್ಮದಿನ ಶುಭಾಶಯಗಳಲ್ಲ. ರಾಷ್ಟ್ರದ ಅತಿ ಶಕ್ತಿಶಾಲಿ ಮೂರು ಸ್ಥಾನಗಳಿಂದ - ಪ್ರಧಾನಿ, ರಾಷ್ಟ್ರಪತಿ, ಗೃಹಮಂತ್ರಿಗಳಿಂದ- ಬಂದಿರುವುದರಿಂದ ಇದು ಕೇವಲ ಗೌರವ ಅಲ್ಲ, ಒಂದು ಪ್ರಾತಿನಿಧಿಕ ರಾಜಕೀಯ ಸಂದೇಶ. ಆದರೆ ಇದೇ ಸಂದರ್ಭದಲ್ಲಿ ನಾಗರಿಕ ಸಮಾಜ, ಮಹಿಳಾ ಹೋರಾಟಗಾರರು ಮತ್ತು ಕರಾವಳಿ ಪ್ರಜ್ಞಾವಂತರು ವರ್ಷಗಳಿಂದ ಕೇಳಿಬರುತ್ತಿರುವ ನಿರಾಕರಿಸಲಾಗದ ಆರೋಪಗಳಿಗೆ ಉತ್ತರಕ್ಕಾಗಿ ಕಾಯುತ್ತಲೇ ಇದ್ದಾರೆ. ಇದೇ ವ್ಯತ್ಯಾಸ ಜನರಲ್ಲಿ ಗೊಂದಲ, ಅಸಮಾಧಾನ ಮತ್ತು ನೈತಿಕ ಪ್ರಶ್ನೆಗಳ ಜಿಜ್ಞಾಸೆಯನ್ನು ಹೆಚ್ಚಿಸಿದೆ.

ವೀರೇಂದ್ರ ಹೆಗ್ಗಡೆ ಮತ್ತು ಧರ್ಮಸ್ಥಳಕ್ಕೆ ಸಂಬಂಧಿಸಿದ ಸಂಸ್ಥೆಗಳ ಮೇಲೆ ಇರುವ ಆರೋಪಗಳು ಅಸಂಬದ್ಧ ಮಾತುಕತೆಗಳಲ್ಲ. ಸುಳ್ಳು ದಾಖಲೆ ನೀಡಿ ಸರ್ಕಾರದ ಭೂ ಮಂಜೂರಾತಿ ಪಡೆದುಕೊಂಡಿರುವುದು, ಹೆಗ್ಗಡೆ ಕುಟುಂಬದ ನಿಯಂತ್ರಣದಲ್ಲಿರುವ ಸಂಸ್ಥೆಗಳಿಂದ ತೆರಿಗೆ ತಪ್ಪಿಸುವಿಕೆ, ಹೆಗ್ಗಡೆ ಕುಟುಂಬದ ನಿಯಂತ್ರಿತ ಸಮಾಜ ಸೇವಾ ಸಂಸ್ಥೆಗಳಲ್ಲಿ ಪರಿಶಿಷ್ಟ ವರ್ಗದ ನೌಕರರಿಗೆ ಅನ್ಯಾಯ ಮುಂತಾಗಿ ದಾಖಲಾತಿಗಳೊಂದಿಗೆ ಮಂಡನೆಯಾಗಿದ್ದವು.  ಕೆಲವು ಹೋರಾಟಗಾರರು ಕೇಂದ್ರ ಸರ್ಕಾರದ ಬಾಗಿಲನ್ನೇ ತಟ್ಟಿದ್ದರು. ಆದರೆ ಕೇಂದ್ರ ಮತ್ತು ರಾಜ್ಯ ಎರಡೂ ಮಟ್ಟಗಳಲ್ಲಿ ಸಹ, ಸಮರ್ಪಕ ತನಿಖೆ ಅಥವಾ ಸಾರ್ವಜನಿಕ ಸ್ಪಷ್ಟನೆ ಎಂಬುದು ಹಲವು ವರ್ಷಗಳಿನಿಂದ ಕಾಣಿಸದೆ ಇರುವುದೇ ದೊಡ್ಡ ಪ್ರಶ್ನೆ.

ಇದಕ್ಕೆ ಹೆಚ್ಚುವರಿಯಾಗಿ, ಹೆಗ್ಗಡೆಗಳ ವಿರುದ್ಧ ಮಹಿಳಾ ಸಂಘಟನೆಗಳ ಕೋಪವೂ ಕರಾವಳಿಯಲ್ಲಿ ಪ್ರಖರವಾಗಿದೆ. ಸಾಮೂಹಿಕ ಅತ್ಯಾಚಾರ ಮತ್ತು ಕೊಲೆಗಳಂಥ ಕೆಲವು ಸಂವೇದನಾಶೀಲ ಪ್ರಕರಣಗಳಲ್ಲಿ ನ್ಯಾಯ ದೊರಕಲಿಲ್ಲ ಎಂಬ ಆರೋಪ, ಕೆಲವು ವ್ಯಕ್ತಿಗಳಿಗೆ ರಕ್ಷಣೆಯ ವಾತಾವರಣ ಸೃಷ್ಟಿಸಲಾಗಿದೆ ಎಂಬ ಅನುಮಾನ - ಇವು ಮಹಿಳೆಯರ ಆಕ್ರೋಶಕ್ಕೆ ಕಾರಣವಾದವು. "ನಮ್ಮ ಮಾತಿಗೆ ಸರ್ಕಾರ ಕಿವಿಗೊಡಲ್ವಾ?" ಎಂಬ ಪ್ರಶ್ನೆಯನ್ನು ಅವರು ಬೀದಿಗಳಲ್ಲಿ ಗಟ್ಟಿಯಾಗಿ ಕೇಳುತ್ತಿದ್ದಾರೆ. ಒಂದು ಬದಿಯಲ್ಲಿ ಅಸಹಾಯಕ ಮಹಿಳೆಯರ ರೋದನ, ಮತ್ತೊಂದು ಬದಿಯಲ್ಲಿ ಕೇಂದ್ರ ನಾಯಕರಿಂದ ಹೆಗ್ಗಡೆಗೆ ಬರುವ ಗೌರವ ಸಂದೇಶ - ಈ ದೃಶ್ಯಸಂಯೋಜನೆ ಜನರ ಆತ್ಮಸಾಕ್ಷಿಗೆ ತಾಕುತ್ತದೆ.

ಆದರೆ ಪಕ್ಷ ರಾಜಕೀಯಕ್ಕೆ ಇದು ಅಚ್ಚರಿಯ ವಿಷಯವಲ್ಲ. ಧಾರ್ಮಿಕ-ಸಾಮಾಜಿಕ ಪ್ರಭಾವ ಹೊಂದಿರುವ ವ್ಯಕ್ತಿಗಳು ಭಾರತೀಯ ರಾಜಕೀಯದ ವಿವಿಧ ಸ್ತರಗಳಲ್ಲಿ ವಿಶೇಷ ಸ್ಥಾನ ಪಡೆದಿರುವುದು ಹೊಸದೇನಲ್ಲ. ಧರ್ಮಸ್ಥಳದಂತಹ ವಿಸ್ತಾರವಾದ ಸಾಂಸ್ಥಿಕ ಜಾಲ, ಗ್ರಾಮಾಭಿವೃದ್ಧಿ ಯೋಜನೆಗಳು, ಲೇವಾದೇವಿ  ಚಟುವಟಿಕೆಗಳು ವರ್ಷಗಳಿಂದ ಸಾಮಾಜಿಕ ಬಂಡವಾಳ ನಿರ್ಮಾಣ ಮಾಡಿವೆ. ಕರಾವಳಿಯ ಚುನಾವಣಾ ಸಮೀಕರಣಗಳಲ್ಲಿ ಈ ಪ್ರಭಾವ ರಾಜಕೀಯ ಪಕ್ಷಗಳಿಗೆ ಅಮೂಲ್ಯ. ಇದೇ ಕಾರಣಕ್ಕೆ ಸರ್ಕಾರಗಳು, ವಿಶೇಷವಾಗಿ ಕೇಂದ್ರ ಸರ್ಕಾರ, ವಿಮರ್ಶೆಯನ್ನು ಎದುರಿಸುವುದಕ್ಕಿಂತ ಮೌನವನ್ನು ಆಯ್ಕೆಮಾಡುತ್ತವೆ.

ಪ್ರಧಾನಿ ನರೇಂದ್ರ ಮೋದಿ ಕೆಲ ವರ್ಷಗಳ ಹಿಂದೆ ಹೆಗ್ಗಡೆ ಅವರನ್ನು ರಾಜ್ಯಸಭೆಗೆ ನೇಮಿಸಿದ್ದೂ ಇದೇ ರೀತಿಯ ವಿವಾದಗಳ ಮಧ್ಯೆಯೇ. ಈ ಹೊಸ ಶುಭಾಶಯಗಳು ಆ ನಿರಂತರ ಬೆಂಬಲಕ್ಕೆ ಮತ್ತೊಂದು ಮುದ್ರೆಯಾಗಿದೆ. ಇದರಿಂದ ಸಾರ್ವಜನಿಕರಿಗೆ ಹೋಗುವ ಸಂದೇಶ ಸ್ಪಷ್ಟ: "ನಾವು ಇವರನ್ನು ನಮ್ಮ ಮಿತ್ರರೆಂದು ನೋಡುತ್ತೇವೆ; ವಿಮರ್ಶೆಗಳು ನಮ್ಮ ನಿರ್ಧಾರವನ್ನು ಬದಲಾಯಿಸುವುದಿಲ್ಲ."

ಇದು ಪ್ರಜಾಪ್ರಭುತ್ವದ ನೈತಿಕ ನೆಲೆಗಟ್ಟಿಗೆ ಹೊಡೆತ ನೀಡುತ್ತದೆ. ಈ ಸಾರ್ವಜನಿಕ ಆರೋಪಗಳಿಗೆ ಸರಿಯಾದ, ದಕ್ಷ, ಪಾರದರ್ಶಕ ತನಿಖೆ ನಡೆಸಬೇಕಾಗಿದ್ದವರು ಮೌನವಾಗಿರುವುದು ಸಮಸ್ಯೆ.

ಅಂತಿಮವಾಗಿ, ಇವೆಲ್ಲ ಒಂದು ಪ್ರಶ್ನೆಯನ್ನು ಎತ್ತುತ್ತದೆ: ಪ್ರಭಾವಶಾಲಿಗಳ ಬಗ್ಗೆ ಕಾನೂನು ಮತ್ತು ನೈತಿಕತೆ ಬೇರೆ ನಿಯಮ ಪಾಲಿಸುವುದೇ? ಜನಶಕ್ತಿಗಿಂತ ಪ್ರಭಾವಶಕ್ತಿಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡಿದರೆ, ಜನರ ನಂಬಿಕೆ ಕುಸಿಯುವುದು ಸಹಜ. ಕರಾವಳಿಯ ಇಂದಿನ ವಾತಾವರಣ ಇಂದು ಇದನ್ನೇ ಪ್ರತಿಬಿಂಬಿಸುತ್ತದೆ.