ಧರ್ಮಸ್ಥಳ ಸಾಮೂಹಿಕ ಹತ್ಯೆ ವಿವಾದ: ಉಲ್ಟಾ ಹೊಡೆದ ಆರೋಪಿ

 200 ಕೋಟಿ ರೂ ಪಿತೂರಿ ಜಾಲದ ಆರೋಪ ಅಸಲಿ ವಿಚಾರದ ತನಿಖೆ ತಪ್ಪಿಸುವ ಕುತಂತ್ರ

ಸಂಪಾದಕೀಯ

ಧರ್ಮಸ್ಥಳದ ಆಡಳಿತ ಮಂಡಳಿಯ ವಿರುದ್ಧ ನೂರಾರು ಮಹಿಳೆಯರ ಹತ್ಯೆ ಮತ್ತು ಸಾಮೂಹಿಕ ಹೂತುಹಾಕುವಿಕೆಯಂತಹ ಗಂಭೀರ ಆರೋಪಗಳನ್ನು ಮಾಡಿದ್ದ ವ್ಯಕ್ತಿಯು, ಈಗ ಹಠಾತ್ ಆಗಿ ಯು-ಟರ್ನ್ ತೆಗೆದುಕೊಂಡಿರುವುದು ಕರ್ನಾಟಕದ ಸಾರ್ವಜನಿಕ ವಲಯದಲ್ಲಿ ತೀವ್ರ ಸಂಚಲನ ಮೂಡಿಸಿದೆ. ಧರ್ಮಸ್ಥಳದ ಘನತೆಗೆ ಧಕ್ಕೆ ತರಲು 200 ಕೋಟಿ ರೂಪಾಯಿಗಳ ಬೃಹತ್ ಪಿತೂರಿ ನಡೆದಿತ್ತು ಎಂಬ ಅವರ ಹೊಸ ಹೇಳಿಕೆಯು ಈ ಇಡೀ ವಿವಾದಕ್ಕೆ ಸಂಪೂರ್ಣ ಹೊಸ ಆಯಾಮವನ್ನು ನೀಡಿದೆ. ಈ ಬೆಳವಣಿಗೆಯನ್ನು ಗಮನಿಸಿದಾಗ ಕೆಲವು ಪ್ರಮುಖ ಅಂಶಗಳು ಎದ್ದು ಕಾಣುತ್ತವೆ:

ಮೊದಲನೆಯದಾಗಿ, ಇಷ್ಟು ದಿನಗಳ ಕಾಲ ಅತ್ಯಂತ ಗಂಭೀರ ಆರೋಪಗಳನ್ನು ಮಾಡುತ್ತಾ ಬಂದಿದ್ದ ವ್ಯಕ್ತಿ, ಇದ್ದಕ್ಕಿದ್ದಂತೆ ಯೂ ಟರ್ನ್ ಹೊಡೆದು ಯಾವುದೇ ಪೂರ್ವ ಸೂಚನೆ ಇಲ್ಲದೆ ಇಷ್ಟು ದೊಡ್ಡ ಮೊತ್ತದ ಪಿತೂರಿಯ ಬಗ್ಗೆ ಮಾತನಾಡಿರುವುದು ತನಿಖಾ ದೃಷ್ಟಿಯಿಂದ ಮತ್ತು ಸಾರ್ವಜನಿಕ ನಂಬಿಕೆಯ ದೃಷ್ಟಿಯಿಂದ ಆಘಾತಕಾರಿಯಾಗಿದೆ. ಇದು ಎಸ್‍ಐಟಿ ತನಿಖೆಯ ದಿಕ್ಕನ್ನೇ ಬದಲಿಸುವ ಯತ್ನ ಎಂದೇ ಮೇಲ್ನೋಟಕ್ಕೆ ಕಾಣುತ್ತದೆ. ಈ ಹಠಾತ್ ಬದಲಾವಣೆಯು ಸ್ವಯಂಪ್ರೇರಿತವೇ ಅಥವಾ ಇದರ ಹಿಂದೆ ಬೇರೆ ಯಾವುದೇ ರೀತಿಯ ಪ್ರಭಾವ, ಒತ್ತಡ ಅಥವಾ ಆಮಿಷಗಳು ಕೆಲಸ ಮಾಡಿವೆಯೇ ಎಂಬ ಅನುಮಾನ ಮೂಡುವುದು ಸಹಜ. ಸುಪ್ರೀಂ ಕೋರ್ಟು ಧರ್ಮಸ್ಥಳದ ಸಾಮೂಹಿಕ ಹತ್ಯೆ ಮತ್ತು ಅತ್ಯಾಚಾರ ವಿಚಾರದಲ್ಲಿ ಒಂದು ನಿರ್ಣಾಯಕ ಹಂತಕ್ಕೆ ಬಂದಿದೆ ಎನ್ನುವಾಗ ಈ ಹೊಸ ಆರೋಪ ಕೋರ್ಟಿನ ಹಾದಿ ತಪ್ಪಿಸುವ ಉದ್ದೇಶ ಹೊಂದಿದೆಯೇ ಎನ್ನುವ ಪ್ರಬಲ ಸಂಶಯವೂ ಉಂಟಾಗಿದೆ. 

ಎರಡನೆಯದಾಗಿ, ಈ ಇಡೀ ಪ್ರಕರಣದಲ್ಲಿ ಸತ್ಯಾಸತ್ಯತೆಯನ್ನು ಹೊರತರುವುದು ಈಗ ತನಿಖಾ ಸಂಸ್ಥೆಗಳಿಗೆ ದೊಡ್ಡ ಸವಾಲಾಗಿದೆ. ಆರಂಭದಲ್ಲಿ ಮಾಡಲಾದ ನೂರಾರು ಮಹಿಳೆಯರ ಹತ್ಯೆಯ ಆರೋಪಕ್ಕೆ ಎದುರಾಗಿ 200 ಕೋಟಿ ರೂಪಾಯಿಗಳ ಪಿತೂರಿಯ ಆರೋಪ ಎದ್ದಿರುವುದು ಸ್ಪಷ್ಟ. ಈ ಎರಡೂ ಆರೋಪಗಳು ಅತ್ಯಂತ ಗಂಭೀರ ಸ್ವರೂಪದ್ದಾಗಿದ್ದು,  ನಿಷ್ಪಕ್ಷಪಾತ ಹಾಗೂ ಆಳವಾದ ಕಾನೂನು ತನಿಖೆಯ ಅಗತ್ಯವಿದೆ.

ಮೂರನೆಯದಾಗಿ, ಯಾರಾದರೂ ಏನಾದರೊಂದು ಆರೋಪ ಮಾಡಿದರೆಂದರೆ, ಅದು ತನಿಖೆಯಿಂದ ಪುರಾವೆಯಾಗುವವರೆಗೂ ಅದಕ್ಕೇನೂ ಮಹತ್ವವಿರುವುದಿಲ್ಲ. ಬೆಳ್ತಂಗಡಿ ಕೋರ್ಟಿಗೆ ತಾನು ಮಾಡಿದ್ದ ಆರೋಪಗಳೆಲ್ಲ ತನ್ನ ಸುತ್ತುವರಿದುಕೊಳ್ಳುತ್ತವೆ ಎನ್ನುವ ಸೂಚನೆ ಸಿಕ್ಕಿದಾಗ ಆರೋಪಿ ಯೂ ಟರ್ನ್ ಹೊಡೆದು ತಾನು ಯಾರ ವಿರುದ್ಧ ಆರೋಪ ಮಾಡಿದ್ದೆನೋ ಅವರಿಗೆ ಸಹಾಯವಾಗುವ ಆರೋಪ ಈಗ ಮಾಡಿರುವುದರಲ್ಲಿಯೇ ದೊಡ್ಡ ಷಡ್ಯಂತ್ಯ ಮತ್ತು ಪಿತೂರಿ ಕಾಣಿಸುತ್ತಿದೆ.  ಇದರ ಒಳಸುಳಿ ಏನು ಎನ್ನುವುದು ಗೊತ್ತಾಗಬೇಕು. 

ಒಟ್ಟಾರೆಯಾಗಿ ಹೇಳುವುದಾದರೆ, ಈ ಪ್ರಕರಣವು ಕೇವಲ ವ್ಯಕ್ತಿಯೊಬ್ಬನ ಹೇಳಿಕೆಯಾಗಿ ಉಳಿದಿಲ್ಲ. ಇದು ಕರ್ನಾಟಕದ ಸಾಮಾಜಿಕ ಮತ್ತು ಕಾನೂನು ಸುವ್ಯವಸ್ಥೆಯ ಮೇಲೆ ಪ್ರಭಾವ ಬೀರುವ ದೊಡ್ಡ ಚರ್ಚೆಯಾಗಿ ಮಾರ್ಪಟ್ಟಿದೆ. ರಾಜಕೀಯ ಅಥವಾ ವೈಯಕ್ತಿಕ ಹಿತಾಸಕ್ತಿಗಳಿಗಾಗಿ ಇಂತಹ ಸೂಕ್ಷ್ಮ ವಿಷಯಗಳನ್ನು ಬಳಸಿಕೊಳ್ಳಲಾಗುತ್ತಿದೆಯೇ ಎಂಬುದನ್ನು ಪತ್ತೆಹಚ್ಚಲು ಉನ್ನತ ಮಟ್ಟದ ತನಿಖೆ ಅನಿವಾರ್ಯವಾಗಿದೆ. ಸುಪ್ರೀಂ ಕೋರ್ಟ್ ನಿರ್ದೇಶಿತ ತನಿಖೆ ಮಾತ್ರ ಎಲ್ಲಾ ಗೋಜಲುಗಳನ್ನು ಬಗೆಹರಿಸಿ ನಿಜವಾದ ತಪ್ಪಿತಸ್ಥರನ್ನು ಪತ್ತೆ ಮಾಡಬಲ್ಲದು.