ರಾಜ್ಯದಲ್ಲಿ ಕಾಂಗ್ರೆಸ್ ಪುನರುತ್ಥಾನದ ಹಿಂದಿನ ಮೌನ ತಂತ್ರಜ್ಞ: ಸುನೀಲ್ ಕನುಗೋಲು

 ಡಿಕೆಶಿ ಸರಕಾರದಲ್ಲಿ ಕ್ಯಾಬಿನೆಟ್ ಮಂತ್ರಿಗಿರಿ ಸ್ಥಾನ ಹೊಂದಿರುವ ವ್ಯಕ್ತಿಯ ಬಗ್ಗೆ ತಿಳಿಯೋಣ ಬನ್ನಿ.

...........

ಅಪ್ರತಿಮ ಸಾಧಕ * ಬಿವಿಸೀ

ಕರ್ನಾಟಕದ ಬಹುತೇಕ ಮತದಾರರಿಗೆ ಸುನೀಲ್ ಕನುಗೋಲು ಎಂಬ ಹೆಸರು ಇನ್ನೂ ಅಪರಿಚಿತವೇ ಆಗಿರಬಹುದು. ಅವರು ಚುನಾವಣೆಗೆ ಸ್ಪರ್ಧಿಸುವುದಿಲ್ಲ, ವೇದಿಕೆಗಳ ಮೇಲೆ ಭಾಷಣ ಮಾಡುವುದಿಲ್ಲ, ದೂರದರ್ಶನ ಚರ್ಚೆಗಳಲ್ಲಿಯೂ ಕಾಣಿಸಿಕೊಳ್ಳುವುದಿಲ್ಲ. ಆದರೂ ಕಳೆದ ಕೆಲವು ವರ್ಷಗಳಲ್ಲಿ ಕರ್ನಾಟಕ ಕಾಂಗ್ರೆಸ್‍ನ ರಾಜಕೀಯ ಪಯಣದ ಮೇಲೆ ಅತ್ಯಂತ ದೊಡ್ಡ ಪ್ರಭಾವ ಬೀರಿರುವ ವ್ಯಕ್ತಿಗಳಲ್ಲಿ ಸುನೀಲ್ ಕನುಗೋಲು ಪ್ರಮುಖರು.

ಕನುಗೋಲು, ಕರ್ನಾಟಕದೊಂದಿಗೆ ನಂಟು ಹೊಂದಿರುವ ತೆಲುಗು ಭಾಷಿಕ ಕುಟುಂಬದಲ್ಲಿ ಜನಿಸಿದರು. ಅವರ ಬಾಲ್ಯ ಮತ್ತು ಶಿಕ್ಷಣದ ಬಹುಭಾಗ ಚೆನ್ನೈನಲ್ಲಿ ಕಳೆದಿದೆ. ರಾಜಕಾರಣಿಯಾಗಿ ಅಲ್ಲ, ಚುನಾವಣಾ ತಂತ್ರ ರೂಪಿಸುವ ಪರಿಣಿತರಾಗಿ ಅವರು ತಮ್ಮ ವೃತ್ತಿಜೀವನವನ್ನು ಕಟ್ಟಿಕೊಂಡರು. ಆರಂಭಿಕ ಹಂತದಲ್ಲಿ ಅವರು ಭಾರತೀಯ ಜನತಾ ಪಕ್ಷದ ಕೆಲವು ಪ್ರಮುಖ ಚುನಾವಣಾ ಕಾರ್ಯತಂತ್ರಗಳೊಂದಿಗೆ ಸಂಬಂಧ ಹೊಂದಿದ್ದರು. ಆದರೆ ಅವರ ರಾಜಕೀಯ ಜೀವನದ ಅತ್ಯಂತ ಮಹತ್ವದ ಅಧ್ಯಾಯ ಆರಂಭವಾದದ್ದು ಕಾಂಗ್ರೆಸ್‍ಗೆ ಸೇರ್ಪಡೆಯಾದ ನಂತರವೇ.

ಕಾಂಗ್ರೆಸ್ ಪಕ್ಷಕ್ಕೆ ಕನುಗೋಲು ಅವರ ಮಹತ್ವವನ್ನು ಅರ್ಥಮಾಡಿಕೊಳ್ಳಬೇಕಾದರೆ 2023ರ ಕರ್ನಾಟಕ ವಿಧಾನಸಭಾ ಚುನಾವಣೆಯತ್ತ ಗಮನ ಹರಿಸಬೇಕು. ಹಲವು ಚುನಾವಣಾ ಸೋಲುಗಳಿಂದ ಕುಗ್ಗಿದ್ದ ಕಾಂಗ್ರೆಸ್‍ಗೆ ಸ್ಪಷ್ಟವಾದ ರಾಜಕೀಯ ಕಥನ ಮತ್ತು ಗೆಲುವಿನ ದಿಕ್ಕು ಅಗತ್ಯವಾಗಿತ್ತು. ಈ ಸಂದರ್ಭದಲ್ಲಿ ಕನುಗೋಲು ಅವರ ತಂಡ ರಾಜ್ಯದಾದ್ಯಂತ ವ್ಯಾಪಕ ಸಮೀಕ್ಷೆಗಳು, ಮತದಾರರ ಅಭಿಪ್ರಾಯ ಸಂಗ್ರಹ, ಕ್ಷೇತ್ರಮಟ್ಟದ ಮಾಹಿತಿ ವಿಶ್ಲೇಷಣೆ ಮತ್ತು ಸಂದೇಶ ನಿರ್ವಹಣೆಗೆ ಒತ್ತು ನೀಡಿತು. ಅದರ ಪರಿಣಾಮವಾಗಿ ಭ್ರಷ್ಟಾಚಾರದ ಆರೋಪಗಳು, ಆಡಳಿತ ವೈಫಲ್ಯಗಳು ಮತ್ತು ಜನಪರ ಭರವಸೆಗಳ ಸುತ್ತ ಕಟ್ಟಲ್ಪಟ್ಟ ಬಲವಾದ ಚುನಾವಣಾ ಪ್ರಚಾರ ರೂಪುಗೊಂಡಿತು.

`ಪೇಸಿಎಂ', '40 ಶೇಕಡಾ ಸರ್ಕಾರ' ಎಂಬ ಪ್ರಚಾರಪತ್ರವಾಗಲಿ ಅಥವಾ ಕಾಂಗ್ರೆಸ್‍ನ ಐದು ಭರವಸೆಗಳ ಪ್ರಚಾರವಾಗಲಿ, ಅವು ಕೇವಲ ಚುನಾವಣಾ ಘೋಷಣೆಗಳಲ್ಲ. ಮತದಾರರ ಮನೋಭಾವವನ್ನು ಅರ್ಥಮಾಡಿಕೊಂಡು ಅದನ್ನು ಪರಿಣಾಮಕಾರಿ ರಾಜಕೀಯ ಸಂದೇಶವಾಗಿ ಪರಿವರ್ತಿಸುವ ಪ್ರಯತ್ನದ ಫಲವಾಗಿದ್ದವು. ಬಿಜೆಪಿ ಜತೆಗಿನ ಹೋಲಿಕೆಯಲ್ಲಿ ನೋಡುವವರಿಗೆ ಅಷ್ಟೇನೂ ವತ್ಯಾಸವಿರದ ಕಾಂಗ್ರೆಸ್ ಪಕ್ಷಕ್ಕೆ ಗೆಲುವು ತಂದುಕೊಟ್ಟ ಕನುಗೋಲು ಅಸಾಧ್ಯವಾದುದನ್ನೇ ಸಾಧಿಸಿದ ಮಹಾಚಾಣಾಕ್ಷ. ಕರ್ನಾಟಕದಲ್ಲಿ ಕಾಂಗ್ರೆಸ್ ಸಾಧಿಸಿದ ಭರ್ಜರಿ ಗೆಲುವಿನ ಬಳಿಕ ಕನುಗೋಲು ಅವರ ಪ್ರಭಾವ ಪಕ್ಷದೊಳಗೆ ಇನ್ನಷ್ಟು ವಿಸ್ತರಿಸಿತು. ಇಂದಿನ ರಾಜಕೀಯದಲ್ಲಿ ಕೇವಲ ನಾಯಕರ ಜನಪ್ರಿಯತೆ ಮಾತ್ರವಲ್ಲ, ಅಂಕಿಅಂಶಗಳು, ಸಂಶೋಧನೆ, ಜನಾಭಿಪ್ರಾಯ ಮತ್ತು ನಿಖರ ಸಂದೇಶ ರಚನೆಯೂ ಚುನಾವಣಾ ಯಶಸ್ಸಿನ ನಿರ್ಣಾಯಕ ಅಂಶಗಳಾಗಿವೆ ಎಂಬುದನ್ನು ಅವರು ಸಾಬೀತುಪಡಿಸಿದರು.

ಇಂದು ಕನುಗೋಲು ಅವರು ಕೇವಲ ಚುನಾವಣಾ ತಂತ್ರಜ್ಞರಾಗಿ ಮಾತ್ರ ಉಳಿದಿಲ್ಲ. ಮುಖ್ಯಮಂತ್ರಿ  ಶಿವಕುಮಾರ್ ಸರಕಾರದಲ್ಲಿ ಸಂಪುಟ ದರ್ಜೆಯ ಸಚಿವ ಸ್ಥಾನವನ್ನು ಹೊಂದಿ, ಸಿಎಂ ಅವರ ಪ್ರಮುಖ ಸಲಹೆಗಾರರಾಗಿ ಆಡಳಿತದ ಸಂದೇಶ ವಿನ್ಯಾಸ, ಜನಸಂಪರ್ಕ ಕಾರ್ಯಕ್ರಮಗಳು ಹಾಗೂ ಭವಿಷ್ಯದ ರಾಜಕೀಯ ಕಾರ್ಯತಂತ್ರಗಳಲ್ಲಿಯೂ ಪ್ರಮುಖ ಪಾತ್ರ ವಹಿಸುವ ನಿರೀಕ್ಷೆಯಿದೆ.

ಅವರ ಕಾರ್ಯವೈಖರಿಯನ್ನು ಮೆಚ್ಚುವವರಿರಬಹುದು, ಟೀಕಿಸುವವರಿರಬಹುದು. ಆದರೆ ಒಂದು ಸಂಗತಿ ಮಾತ್ರ ಸ್ಪಷ್ಟ. ಸುನೀಲ್ ಕನುಗೋಲು ಅವರು ಬೆಳಕಿನ ವೇದಿಕೆಯ ಮೇಲೆ ಕಾಣಿಸಿಕೊಳ್ಳದಿದ್ದರೂ, ತೆರೆಮರೆಯಲ್ಲಿ ಕುಳಿತು ಒಂದು ರಾಜಕೀಯ ಪಕ್ಷದ ದಿಕ್ಕನ್ನೇ ಬದಲಾಯಿಸುವ ಸಾಮಥ್ರ್ಯ ಹೊಂದಿರುವ ಹೊಸ ತಲೆಮಾರಿನ ರಾಜಕೀಯ ತಂತ್ರಜ್ಞರ ಪ್ರತಿನಿಧಿಯಾಗಿದ್ದಾರೆ. ಕರ್ನಾಟಕ ಕಾಂಗ್ರೆಸ್‍ನ ಇತ್ತೀಚಿನ ಪುನರುತ್ಥಾನದ ಕಥೆಯಲ್ಲಿ ಅವರ ಹೆಜ್ಜೆಗುರುತುಗಳು ಸ್ಪಷ್ಟವಾಗಿ ಕಾಣಿಸುತ್ತವೆ.