ಅಧಿಕಾರ, ದರ್ಪದ ನಡುವೆ ಮಂಕಾದ ಹಿಂದುಳಿದ ಉತ್ತರ ಕನ್ನಡದ ಅಭಿವೃದ್ಧಿ

 ಅಹುದಾದರಹುದೆನ್ನಿ * ಬಿವಿಸೀ

ರ್ನಾಟಕ ರಾಜಕಾರಣದಲ್ಲಿ ಐದು ದಶಕಗಳಿಗೂ ಹೆಚ್ಚು ಕಾಲ ರಘುನಾಥ ರಾವ್ ದೇಶಪಾಂಡೆ ಅವರು ಅತ್ಯಂತ ಪ್ರಭಾವಿ ವ್ಯಕ್ತಿಯಾಗಿ ಮೆರೆದಿದ್ದಾರೆ. ಕೈಗಾರಿಕೆಯಂತಹ ಮಹತ್ವದ ಖಾತೆಗಳನ್ನು ನಿಭಾಯಿಸಿರುವ ಅವರು, ಪ್ರಸ್ತುತ ಆಡಳಿತ ಸುಧಾರಣಾ ಆಯೋಗದ ಅಧ್ಯಕ್ಷರಾಗಿದ್ದಾರೆ. ಉತ್ತರ ಕನ್ನಡ ಜಿಲ್ಲೆಯ ಇತಿಹಾಸದಲ್ಲಿ ಇಷ್ಟು ಸುದೀರ್ಘ ಕಾಲ ಅಧಿಕಾರ ಕೇಂದ್ರದಲ್ಲಿದ್ದ ಮತ್ತೊಬ್ಬ ನಾಯಕರಿಲ್ಲ. ಆದರೆ, ಇಷ್ಟು ದಶಕಗಳ ಕಾಲ ನಿರಂತರವಾಗಿ ಅಧಿಕಾರ ಅನುಭವಿಸಿದರೂ ಜಿಲ್ಲೆಯ ಜ್ವಲಂತ ಸಮಸ್ಯೆಗಳು ಮತ್ತು ಅಭಿವೃದ್ಧಿಯ ಪ್ರಶ್ನೆಗಳಿಗೆ ಉತ್ತರ ಕಂಡುಕೊಳ್ಳಲು ಅವರೇನು ಮಾಡಿದ್ದಾರೆ ಎನ್ನುವುದಕ್ಕೆ ಉತ್ತರವಿಲ್ಲ.

ಉತ್ತರ ಕನ್ನಡ ಜಿಲ್ಲೆಯು ಅರಣ್ಯ ಮತ್ತು ಕರಾವಳಿಯಿಂದ ಸಮೃದ್ಧವಾಗಿದ್ದರೂ, ಇಲ್ಲಿನ ಅನೇಕ ಹಳ್ಳಿಗಳು ಇಂದಿಗೂ ಸರಿಯಾದ ರಸ್ತೆ ಸಂಪರ್ಕವಿಲ್ಲದೆ ಕತ್ತಲಲ್ಲಿವೆ. ಮಲೆನಾಡು ಭಾಗದಲ್ಲಿ ಸುಸಜ್ಜಿತ ರಸ್ತೆಗಳು ಕೇವಲ ಐಷಾರಾಮಿ ಸೌಲಭ್ಯವಲ್ಲ, ಅವು ಜನರ ದೈನಂದಿನ ಬದುಕಿನ ಜೀವನಾಡಿಗಳು. ಆದರೆ ದಶಕಗಳಿಂದ ರಸ್ತೆ ಮೂಲಸೌಕರ್ಯವು ಇಲ್ಲಿ ಅತ್ಯಂತ ದುರ್ಬಲವಾಗಿದೆ. ಪರಿಸರಕ್ಕೆ ಪೂರಕವಾದ ಸಣ್ಣ ಕೈಗಾರಿಕೆಗಳನ್ನು ಸ್ಥಾಪಿಸಿ ಸ್ಥಳೀಯ ಯುವಕರಿಗೆ ಉದ್ಯೋಗ ನೀಡಲು ಸಾಧ್ಯವಿದ್ದರೂ, ದೇಶಪಾಂಡೆ ಅವರು ಸಚಿವರಾಗಿದ್ದ ಸುದೀರ್ಘ ಅವಧಿಯಲ್ಲಿ ಅಂತಹ ಯಾವುದೇ ಕ್ರಾಂತಿಕಾರಿ ಬದಲಾವಣೆಗಳು ಸಂಭವಿಸಲಿಲ್ಲ. "ಪರಿಸರವಾದಿಗಳ ವಿರೋಧ" ಎಂಬ ಹಳೇ ಸಬೂಬನ್ನೇ ಪದೇ ಪದೇ ಹೇಳಿದರು. ಆದರೆ ಮೂಲಭೂತ ಸಂಪರ್ಕ ಅಥವಾ ಸ್ಥಳೀಯ ಉದ್ಯಮಗಳಿಗೆ ಉತ್ತೇಜನ ನೀಡಲು ಪರಿಸರ ಸೂಕ್ಷ್ಮತೆಯು ಅಡ್ಡಿಯಾಗಲು ಹೇಗೆ ಸಾಧ್ಯ? ಇದು ಕೇವಲ ಇಚ್ಛಾಶಕ್ತಿಯ ಕೊರತೆಯಲ್ಲವೇ?

ಇಂದು ದೇಶಪಾಂಡೆ ಅವರು ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರ ಸಾಧನೆಯನ್ನು ಪ್ರಶ್ನಿಸುತ್ತಿದ್ದಾರೆ. ಆದರೆ ಒಬ್ಬ ಸಚಿವರಿಗೆ ಇರುವ ಕಾಯಾರ್ಂಗದ ಅಧಿಕಾರ ಮತ್ತು ಒಬ್ಬ ಸಂಸದನಿಗಿರುವ ಸೀಮಿತ ಅಧಿಕಾರದ ನಡುವೆ ದೊಡ್ಡ ವ್ಯತ್ಯಾಸವಿದೆ. ಕೇಂದ್ರದ ಯೋಜನೆಗಳಿಗಾಗಿ ಸಂಸದರು ಹೋರಾಡುತ್ತಿದ್ದರೆ, ಮೂರು ದಶಕಗಳ ಕಾಲ ರಾಜ್ಯದ ಅತ್ಯಂತ ಪ್ರಭಾವಿ ಸಚಿವರಾಗಿದ್ದ ದೇಶಪಾಂಡೆ ಅವರು ಜಿಲ್ಲೆಯ ಸಮಗ್ರ ಅಭಿವೃದ್ಧಿಗೆ ದಿಕ್ಸೂಚಿಯಾಗಬಲ್ಲ ಯೋಜನೆಗಳನ್ನು ತರಲು ವಿಫಲರಾಗಿದ್ದೇಕೆ?

ಪ್ರಸ್ತುತ ಅವರು ಆಡಳಿತ ಸುಧಾರಣಾ ಆಯೋಗದ ಅಧ್ಯಕ್ಷರಾಗಿದ್ದಾರೆ ಮತ್ತು ಸಿದ್ದರಾಮಯ್ಯನವರ ನೇತೃತ್ವದ ಸರ್ಕಾರದಲ್ಲಿ ಅವರ ಮಾತಿಗೂ ಗೌರವವಿದೆ. ಆದರೂ ಜಿಲ್ಲೆಯ ದೀರ್ಘಕಾಲದ ಮೂಲಸೌಕರ್ಯ ಸಮಸ್ಯೆಗಳನ್ನು ಬಗೆಹರಿಸಲು ಅವರ ಕಡೆಯಿಂದ ಯಾವುದೇ ಗಟ್ಟಿ ಧ್ವನಿ ಕೇಳಿಬರುತ್ತಿಲ್ಲ. ರಾಜಕೀಯದಲ್ಲಿ ಸುದೀರ್ಘ ಅನುಭವವು ಕೇವಲ ಗೌರವ ತರುವುದಿಲ್ಲ, ಅದು ಜನರಿಗೆ ಉತ್ತರಿಸುವ ಮಹತ್ತರ ಜವಾಬ್ದಾರಿಯನ್ನೂ ಹೊರಿಸುತ್ತದೆ. ಇತರರನ್ನು ಪ್ರಶ್ನಿಸುವ ಮೊದಲು, ದಶಕಗಳ ಕಾಲ ಅಧಿಕಾರದಲ್ಲಿದ್ದಾಗ ಉತ್ತರ ಕನ್ನಡಕ್ಕೆ ತಾವು ನೀಡಿದ ಕೊಡುಗೆಗಳ ಬಗ್ಗೆ ಅವರು ಪಾರದರ್ಶಕ ಲೆಕ್ಕ ನೀಡಬೇಕಿದೆ. ಹಿರಿಯರು ಕೇವಲ ಮಾರ್ಗದರ್ಶಕರಾಗದೆ, ಜಿಲ್ಲೆಯ ಹಿತದೃಷ್ಟಿಯಿಂದ ಸಾಧಕರಾಗಿಯೂ ಕಾಣಿಸಿಕೊಳ್ಳಬೇಕಾದ ಅನಿವಾರ್ಯತೆ ಇದೆ. ಜಿಲ್ಲೆಯ ಜನತೆ ಈಗ ಕೇವಲ ಭರವಸೆಗಳನ್ನಲ್ಲ, ಬದಲಾಗಿ ಕಣ್ಣಿಗೆ ಕಾಣುವಂತಹ ಅಭಿವೃದ್ಧಿಯನ್ನು ಬಯಸುತ್ತಿದ್ದಾರೆ.