ಮೋಹನದಾಸ್ ಪೈಯವರೇ, ಧರ್ಮಸ್ಥಳದ ಬಗ್ಗೆ `ನ್ಯೂಸ್ ಮಿನಿಟ್' ಮಾಡಿದ ವರದಿ `ಹಿಟ್' ಕೆಲಸವಲ್ಲ: ಸತ್ಯಾಧರಿತ ಪತ್ರಿಕೋದ್ಯಮ

 ಧರ್ಮಸ್ಥಳದ ಸಾಮೂಹಿಕ ಅಂತ್ಯಕ್ರಿಯೆಗಳ ಕುರಿತ ವರದಿ `ದಿ ನ್ಯೂಸ್ ಮಿನಿಟ್' ವೆಬ್ ಸೈಟಿನಲ್ಲಿ ನಿಖರವಾದ ದಾಖಲೆಗಳ ಆಧಾರದಲ್ಲಿ ಪ್ರಕಟವಾಗಿತ್ತು. ಅದು ಯಾರನ್ನಾದರೂ ಗುರಿ ಮಾಡುವ ಉದ್ದೇಶದಿಂದ ಮಾಡಿದ ಕೆಲಸವಲ್ಲ. ಸಂಪಾದಕಿ ಧನ್ಯಾ ರಾಜೇಂದ್ರನ್ ಮತ್ತು `ದಿ ಹಿಂದೂ' ಪತ್ರಿಕೆಯಲ್ಲಿ ದಶಕಗಳಷ್ಟು ಹಿಂದೆಯೇ ಬೊಫರ್ಸ್ ಪ್ರಕರಣ ಹೊರಹಾಕಿದ್ದ ಚಿತ್ರಾ ಸುಬ್ರಹ್ಮಣ್ಯ ಅವರು ವಸ್ತುನಿಷ್ಠ ಮಾಹಿತಿಯನ್ನು ಪರಿಶೀಲಿಸಿ ಪ್ರಕಟಿಸುವಲ್ಲಿ ಖ್ಯಾತಿ ಹೊಂದಿದ್ದಾರೆ. ಅವರ ವರದಿ ಪ್ರಕಟವಾಗುವ ಮೊದಲು ಸಾಕ್ಷಿ, ದಾಖಲೆ ಮತ್ತು ಹಲವು ದೃಷ್ಟಿಕೋನಗಳನ್ನು ಪರಿಶೀಲಿಸುವುದು ಅವರ ಪದ್ದತಿ.

ಆದರೆ ಉದ್ಯಮಿ ಮೋಹನದಾಸ್ ಪೈ ಅವರು ಸಾಮಾಜಿಕ ಜಾಲತಾಣದಲ್ಲಿ ಈ ವರದಿಯನ್ನು `ಹಿಟ್ ಕೆಲಸ' ಎಂದು ಕರೆದಿದ್ದು ಪ್ರಮಾದ. ಇದೇ ಪ್ರಕರಣದಲ್ಲಿ ಬೃಹತ್ ಮಾಧ್ಯಮಗಳು ಮಾಡಿದ ವರದಿಗಳು ಎಷ್ಟು ಏಕಪಕ್ಷೀಯವಾಗಿದ್ದವು ಎಂಬುದನ್ನು ಪೈ ಅವರೇ ನೋಡಬೇಕು. ಧರ್ಮಸ್ಥಳದ ಪ್ರಭಾವಿ ವ್ಯಕ್ತಿಗಳನ್ನು ರಕ್ಷಿಸುವ ಪ್ರಯತ್ನ ಕೆಲ ವಾಹಿನಿಗಳಲ್ಲಿ ನಡೆದಿತ್ತು, ಆದರೆ `ದಿ ನ್ಯೂಸ್ ಮಿನಿಟ್' ಮಾತ್ರ ಸಾರ್ವಜನಿಕರ ಧ್ವನಿಯನ್ನು ಕೇಳಲು ಧೈರ್ಯ ತೋರಿಸಿತು.

ಮಾಧ್ಯಮದ ಕೆಲಸ ಸರ್ಕಾರ ಅಥವಾ ಧಾರ್ಮಿಕ ಪ್ರಭಾವಿಗಳ ಪರವಾಗಿ ಮಾತನಾಡುವುದಲ್ಲ; ಸತ್ಯವನ್ನು ಪತ್ತೆಹಚ್ಚುವುದಾಗಿದೆ. ಧರ್ಮಸ್ಥಳ ಪ್ರಕರಣದಲ್ಲಿ ವಿಶೇಷ ತನಿಖಾ ತಂಡವು ಅಸ್ವಾಭಾವಿಕ ಸಾವಿನ ವರದಿಗಳಲ್ಲಿ ಅನುಮಾನಾಸ್ಪದ ಮಾದರಿಯನ್ನು ಕಂಡುಹಿಡಿದಿದೆ. ಧರ್ಮಸ್ಥಳ ಮತ್ತು ಬೆಳ್ತಂಗಡಿ ಠಾಣೆಗಳ ವ್ಯಾಪ್ತಿಯಲ್ಲಿಯೇ ಇಂತಹ ಪ್ರಕರಣಗಳು ಹೆಚ್ಚಾಗಿ ದಾಖಲಾಗಿವೆ ಎಂದು ತಂಡದ ಮೂಲಗಳು ಹೇಳಿವೆ. ಇತರ ಸ್ಥಳಗಳಲ್ಲಿ ಇಂತಹ ಮಾದರಿ ಕಂಡುಬಂದಿಲ್ಲ. ಇವುಗಳೆಲ್ಲ ಅಧಿಕೃತ ದಾಖಲೆಗಳೇ. ಇದನ್ನೆಲ್ಲ ಉಲ್ಲೇಖಿಸಿ `ದಿ ನ್ಯೂಸ್ ಮಿನಿಟ್' ವರದಿ ಮಾಡಿತ್ತು. ಅದು ಅತಿರೇಕ ತೋರಿಸಲಿಲ್ಲ; ವಿಶ್ವಾಸಾರ್ಹ ದಾಖಲೆಗಳನ್ನು ಆಧರಿಸಿತು.

ಗ್ರಾಮ ಪಂಚಾಯಿತಿ ದಾಖಲೆಗಳ ಪ್ರಕಾರ 1991ರಿಂದ 2021ರವರೆಗೆ 72 ಶವಗಳನ್ನು ಒಂದೇ ದಿನ ಸಮಾಧಿ ಮಾಡಲಾಗಿದೆ. ವಿಧಾನಸಭೆಯ ಚರ್ಚೆಗಳಲ್ಲಿ ಈ ಘಟನೆಗಳು ಪ್ರಸ್ತಾಪವಾಗಿವೆ. ಉಗ್ರಪ್ಪ ಸಮಿತಿಯು ಕೂಡ ಇದೇ ಅನುಮಾನವನ್ನು ದಾಖಲಿಸಿದೆ. ಇವೆಲ್ಲವನ್ನು ಮರೆತು ವರದಿಯನ್ನು `ಹಿಟ್ ಕೆಲಸ' ಎನ್ನುವುದು ವಾಸ್ತವದ ನಿರ್ಲಕ್ಷ್ಯ.

ಪತ್ರಕರ್ತನ ಕೆಲಸ ಯಾರ ವಿರುದ್ಧ ಬರೆಯಲಾಗಿದೆ ಎನ್ನುವುದಲ್ಲ, ಏಕೆ ಬರೆಯಲಾಗಿದೆ ಮತ್ತು ಎಲ್ಲಿ ತಪ್ಪು ನಡೆದಿದೆ ಎಂಬುದನ್ನು ಪತ್ತೆಹಚ್ಚುವುದು. `ನ್ಯೂಸ್ ಮಿನಿಟ್'ನ ವರದಿಯ ಉದ್ದೇಶ ಇದೇ ಆಗಿತ್ತು.

ಈ ಪ್ರಕರಣದಲ್ಲಿ ಆರೋಪಿ ಚಿನ್ನಯ್ಯ ಅವರನ್ನು ನ್ಯೂಸ್ ಮಿನಿಟ್ ಸಮೇತ ಹಲವು ಮಾಧ್ಯಮಗಳು ಸಂದರ್ಶಿಸಿವೆ. ಅವರು ಶವಗಳನ್ನು ಅಕ್ರಮವಾಗಿ ಹೂತಿದ್ದಾಗಿ ತಾವೇ ಒಪ್ಪಿಕೊಂಡಿದ್ದಾರೆ. ಅಂದರೆ, ನ್ಯೂಸ್ ಮಿನಿಟ್ ವರದಿ ಸುಳ್ಳಿನ ಮೇಲೆ ನಿಂತಿಲ್ಲ. ಅದರ ಕೆಲಸ ಸತ್ಯಾಧಾರಿತ.

ಮಾಧ್ಯಮವನ್ನು ಪ್ರಶ್ನಿಸುವ ಮೊದಲು ಅದರ ಕೆಲಸವನ್ನು ಅಧ್ಯಯನ ಮಾಡಿ ಅರ್ಥಮಾಡಿಕೊಳ್ಳುವ ಶ್ರಮ ಬೇಕು. ದಾಖಲೆಗಳಿಲ್ಲದೆ ಆರೋಪ ಮಾಡುವುದು ಸುಲಭ, ಆದರೆ ಸತ್ಯದ ಎದುರು ನಿಲ್ಲುವುದು ಕಷ್ಟ.

ಪೈಗಳೇ, ನೀವು ಸರ್ಕಾರದ ನೀತಿಗಳು, ರಸ್ತೆ, ಹೂಡಿಕೆ, ಆಡಳಿತದ ದೋಷಗಳ ಬಗ್ಗೆ ಟೀಕಿಸುತ್ತಿದ್ದುದು ನಿಮಗೆ ಒಂದು ಅಭಿಮಾನಿಗಳ ಬಳಗ ಸೃಷ್ಟಿಸಿತ್ತು. ಆದರೆ ಅದೇ ತೀವ್ರತೆಯಿಂದ ಮಾಧ್ಯಮದ ಪ್ರಾಮಾಣಿಕ ಕೆಲಸಕ್ಕೂ ಬೆಂಬಲ ನೀಡಬೇಕು. ಪತ್ರಿಕೋದ್ಯಮ ಎಂದರೆ ನಿಷ್ಪಕ್ಷಪಾತವಾಗಿ ಸತ್ಯ ಹೇಳುವುದು. ಧರ್ಮಸ್ಥಳದ ವಿಷಯದಲ್ಲಿ `ದಿ ನ್ಯೂಸ್ ಮಿನಿಟ್' ಅದೇ ಮಾಡಿದೆ.

ಆದ್ದರಿಂದ ಈ ವರದಿಯನ್ನು `ಹಿಟ್' ಕೆಲಸ ಎಂದು ಕರೆಯುವುದು ನ್ಯಾಯವಲ್ಲ. ಇದು ಸತ್ಯದ ಹುಡುಕಾಟ ಮತ್ತು ಸತ್ಯವನ್ನು ಜನರಿಗೆ ದರ್ಶಿಸುವುದು ಯಾವಾಗಲೂ ಸುಲಭವಲ್ಲ.