ಮುಂದಿನಿಂದ ಹಾಯದ, ಹಿಂದಿನಿಂದ ಒದೆಯದ ಪ್ರಹ್ಲಾದ ಜೋಷಿ ಹರಕೆಯ ಕುರಿ ಆಗುವ ಮುನ್ನ...

 ಕೇಂದ್ರ ಶಿಕ್ಷಣ ಸಚಿವಾಲಯಕ್ಕೆ ಚೈತನ್ಯದಾಯಕ 

ತೇಜಸ್ವಿ ಸೂರ್ಯರನ್ನು ಮೋದಿ ಬದಿಗೊತ್ತಿದ್ದೇಕೆ?

ಖುಲ್ಲಂ ಖುಲ್ಲಾ * ಬಿವಿಸೀ

ಕೇಂದ್ರ ಸಚಿವ ಸಂಪುಟದಿಂದ ಧಮೇರ್ಂದ್ರ ಪ್ರಧಾನ್ ಅವರ ನಿರ್ಗಮನವು ದೇಶದ ಉನ್ನತ ಶಿಕ್ಷಣ ಕ್ಷೇತ್ರದ ಆಡಳಿತದಲ್ಲಿ ಪ್ರಮುಖ ಬದಲಾವಣೆಗೆ ನಾಂದಿ ಹಾಡಿದೆ. ಶಿಕ್ಷಣ ಕ್ಷೇತ್ರದಲ್ಲಿ ಸಮಗ್ರ ಸುಧಾರಣೆ ಬಯಸಿ ಸತತ ಹೋರಾಟ ನಡೆಸುತ್ತಿದ್ದ ವಿದ್ಯಾರ್ಥಿ ಸಂಘಟನೆಗಳು ಮತ್ತು ಸುಧಾರಣಾವಾದಿಗಳ ತೀವ್ರ ಒತ್ತಡಕ್ಕೆ ಮಣಿದು, ಪ್ರಧಾನ್ ಕೊನೆಗೂ ತಮ್ಮ ಹುದ್ದೆಗೆ ರಾಜೀನಾಮೆ ನೀಡಬೇಕಾಯಿತು. ದೇಶದ ಉನ್ನತ ಶಿಕ್ಷಣ ಸಂಸ್ಥೆಗಳ ಚುಕ್ಕಾಣಿ ಹಿಡಿಯಲು ಅತ್ಯುನ್ನತ ಕೌಶಲ್ಯ ಹಾಗೂ ಸ್ಪಷ್ಟ ದೂರದೃಷ್ಟಿಯುಳ್ಳ ನಾಯಕತ್ವದ ಅಗತ್ಯವಿತ್ತು. ಆದರೆ ಆ ಉನ್ನತ ಮಟ್ಟದ ನಿರೀಕ್ಷೆಗಳನ್ನು ತಲುಪುವಲ್ಲಿ ಪ್ರಧಾನ್ ವಿಫಲರಾಗಿ, ರಾಜಕೀಯವಾಗಿ ಭಾರೀ ಬೆಲೆ ತೆರಬೇಕಾಯಿತು.

ಪ್ರಧಾನಿ ನರೇಂದ್ರ ಮೋದಿ ಅವರು ಪ್ರಧಾನ್ ಅವರ ಉತ್ತರಾಧಿಕಾರಿಯಾಗಿ ಸಚಿವ ಪ್ರಹ್ಲಾದ್ ಜೋಶಿ ಅವರನ್ನು ಆಯ್ಕೆ ಮಾಡಿರುವುದು ಅಚ್ಚರಿಗೆ ಕಾರಣವಾಗಿದೆ. ಶಿಕ್ಷಣ ಕ್ಷೇತ್ರವು ಅಧಿಕಾರಿಶಾಹಿಯನ್ನು ಸರಿದಾರಿಗೆ ತರಬಲ್ಲ ಕಟ್ಟುನಿಟ್ಟಾದ ನಾಯಕನನ್ನು ಬಯಸುತ್ತಿರುವ ಈ ಸಮಯದಲ್ಲಿ, ಪ್ರಹ್ಲಾದ್ ಜೋಶಿ ಅವರಂತಹ ಗೋವಿನಂಥ ಹಿರಿಯ ರಾಜಕಾರಣಿಗೆ ಈ ಖಾತೆ ನೀಡಿರುವುದು ಚರ್ಚೆಗೆ ಗ್ರಾಸವಾಗಿದೆ. ತಮ್ಮ ಹಳೆಯ ಸೌಮ್ಯ ರಾಜಕೀಯ ಶೈಲಿಯಿಂದ ಸದಾ ಗುರುತಿಸಿಕೊಂಡಿರುವ ಜೋಶಿ, ಇಂದಿನ ಸವಾಲಿನ ಶೈಕ್ಷಣಿಕ ವಾತಾವರಣವನ್ನು ಸರಿದೂಗಿಸಬಲ್ಲರೇ ಎಂಬ ಪ್ರಶ್ನೆಗಳು ಎದ್ದಿವೆ. ಪ್ರಧಾನ್ ಅವರಿಗಿಂತ ಜೋಶಿ ಭಿನ್ನವಾಗೇನೂ ಸಾಧಿಸಲಾರರು ಎಂಬ ವಿಶ್ಲೇಷಕರ ಅಭಿಪ್ರಾಯಕ್ಕೆ, ಸ್ವತಃ ಜೋಶಿ ಅವರ ಆರಂಭಿಕ ನಿರಾಸಕ್ತ ಪ್ರತಿಕ್ರಿಯೆಯೂ ಪುಷ್ಟಿ ನೀಡುವಂತಿದೆ.

ಈ ಸಚಿವ ಸಂಪುಟ ಪುನಾರಚನೆಯು ಒಂದು ಪ್ರಮುಖ ಪ್ರಶ್ನೆಯನ್ನು ಮುನ್ನೆಲೆಗೆ ತಂದಿದೆ: ಯುವಜನರ ಧ್ವನಿಯಾಗಬಲ್ಲ ಡೈನಮಿಕ್ ತಾಕತ್‍ವಾನರು ಮತ್ತು ವಾಗ್ಮಿಗಳನ್ನು ಕೇಂದ್ರ ನಾಯಕತ್ವ ಏಕೆ ನಿರ್ಲಕ್ಷಿಸಿತು? ಈ ಸ್ಥಾನಕ್ಕೆ ಅತ್ಯಂತ ಸೂಕ್ತ ಅಭ್ಯರ್ಥಿಯಾಗಿ ಬೆಂಗಳೂರು ದಕ್ಷಿಣದ ಸಂಸದ ತೇಜಸ್ವಿ ಸೂರ್ಯ ಕಾಣಿಸುತ್ತಿದ್ದರು. ಎರಡು ಬಾರಿಯ ಸಂಸದರಾಗಿ ಯುವಜನತೆಯಲ್ಲಿ ಜನಪ್ರಿಯತೆ ಗಳಿಸಿರುವ ಸೂರ್ಯ, ಶಿಕ್ಷಣ ಕ್ಷೇತ್ರಕ್ಕೆ ಅಗತ್ಯವಿರುವ ಹೊಸ ಚೈತನ್ಯವನ್ನು ತರಬಲ್ಲವರಾಗಿದ್ದರು. ತಮ್ಮ ಚೈತನ್ಯಶೀಲ ಮುಂಗಾಣ್ಕೆಯಿಂದ ಎಲ್ಲವನ್ನೂ ಸಮರ್ಥವಾಗಿ ನಿಭಾಯಿಸಬಲ್ಲವರಾಗಿದ್ದರು. ಹೈಕೋರ್ಟ್ ವಕೀಲರಾಗಿ ಸೇವೆ ಸಲ್ಲಿಸಿರುವ ಅವರ ಕಾನೂನು ಜ್ಞಾನ ಮತ್ತು ಅಧ್ಯಯನಶೀಲತೆ ಶಿಕ್ಷಣ ಕ್ಷೇತ್ರದ ಸಂಕೀರ್ಣ ನೀತಿಗಳನ್ನು ಅರ್ಥೈಸಿಕೊಳ್ಳಲು ನೆರವಾಗುತ್ತಿತ್ತು. ಲೋಕಸಭೆಯಲ್ಲಿ ಅವರ ಚತುರ ಮಾತುಗಳು ಪ್ರಧಾನಿಯವರ ಗಮನ ಸೆಳೆದಿದ್ದಲ್ಲದೆ, ಇಂಗ್ಲಿಷ್ ಮತ್ತು ಹಿಂದಿ ಭಾಷೆಗಳಲ್ಲಿನ ಪ್ರಬುದ್ಧತೆ ದೇಶದ ಶೈಕ್ಷಣಿಕ ವಲಯದ ಜೊತೆ ಸಂವಹನ ನಡೆಸಲು ದೊಡ್ಡ ಬಲವಾಗುತ್ತಿತ್ತು.

ಜೋಶಿ ಅವರಂತಹ ಹಿರಿಯ ನಾಯಕರಿಗೆ ಆದ್ಯತೆ ನೀಡುವ ಮೂಲಕ ಸರ್ಕಾರವು ಯುವ ಚೈತನ್ಯಕ್ಕಿಂತ ಹಳೆಯ ಆಡಳಿತ ಶೈಲಿಗೆ ಶರಣಾದಂತೆ ಕಾಣುತ್ತಿದೆ. ಪರೀಕ್ಷಾ ಅಕ್ರಮಗಳಿಂದ ಹಿಡಿದು ಜಾಗತಿಕ ವಿಶ್ವವಿದ್ಯಾಲಯಗಳ ಶ್ರೇಯಾಂಕದವರೆಗೆ ಶಿಕ್ಷಣ ಕ್ಷೇತ್ರದ ಮುಂದಿರುವ ಸವಾಲುಗಳು ಹಿಮಾಲಯದಷ್ಟೇ ದೊಡ್ಡವು. ಇವುಗಳನ್ನು ಎದುರಿಸಲು ದೇಶದ ಯುವಜನರ ಭಾವನೆಗಳನ್ನು ಅರ್ಥೈಸಿಕೊಳ್ಳಬಲ್ಲ ಕ್ರಿಯಾಶೀಲ ನಾಯಕತ್ವದ ಅಗತ್ಯವಿತ್ತು. ನೂತನ ಹೊಣೆಗಾರಿಕೆ ವಹಿಸಿಕೊಂಡಿರುವ ಜೋಶಿ ಅವರಿಗೆ ಈ ಕಠಿಣ ಹಾದಿ ಸುಲಭದ್ದಲ್ಲ. ಅವರ ಸಾಂಪ್ರದಾಯಿಕ ಆಡಳಿತ ಶೈಲಿ ಯುವಜನರ ನಿರೀಕ್ಷೆಗಳನ್ನು ಪೂರೈಸುತ್ತದೆಯೇ ಎಂಬುದನ್ನು ಕಾದುನೋಡಬೇಕಿದೆ, ಆದರೆ ಈ ಹಂತದಲ್ಲಿ ಪ್ರಭಾವಿ ಯುವ ನಾಯಕತ್ವವನ್ನು ಬದಿಗೊತ್ತಿರುವುದು ಸರ್ಕಾರದ ದೊಡ್ಡ ಹಿನ್ನಡೆಯಾಗಬಹುದು.