ಧರ್ಮಸ್ಥಳದ ನೆರಳಲ್ಲಿ ನ್ಯಾಯದ ಕದನ

 ಅತ್ಯಾಚಾರ-ಹತ್ಯೆಗಳ ಎಸ್‍ಐಟಿ ತನಿಖೆಗೆ ಸ್ವಾಮಿಗಳು,

ಮತ್ತು ರಾಜಕಾರಣಿಗಳ ಹಸ್ತಕ್ಷೇಪಕ್ಕೆ ಮುಕ್ತಿ ಎಂದು?

ಇದ್ದುದು ಇದ್ದಹಾಗೆ * ಬಿವಿಸೀ

ಧರ್ಮ, ರಾಜಕಾರಣ ಮತ್ತು ಕಾನೂನು ವ್ಯವಸ್ಥೆಗಳ ನಡುವಿನ ಅಪವಿತ್ರ ಮೈತ್ರಿ ಕರಾವಳಿಯ ಪವಿತ್ರ ಕ್ಷೇತ್ರ ಧರ್ಮಸ್ಥಳದ ಘನತೆಗೆ ಧಕ್ಕೆ ತರುತ್ತಿದೆ. ಆಧ್ಯಾತ್ಮಿಕ ಸಾಧನೆ, ಲೋಕಕಲ್ಯಾಣದ ಚಿಂತನೆಗಳಲ್ಲಿ ತೊಡಗಿರಬೇಕಾದ ಕೆಲವು ಮಠಾಧೀಶರು ತಮ್ಮ ಮೂಲ ಸ್ಥಾನಗಳನ್ನು ಮರೆತು ರಾಜಕೀಯ ಪ್ರಚಾರ ಹಾಗೂ ಅಪರಾಧಿಗಳ ಪರವಾಗಿ ವಕಾಲತ್ತು ವಹಿಸಲು ಬೀದಿಗಿಳಿದಿರುವುದು ಅತ್ಯಂತ ಆಘಾತಕಾರಿ ಸಂಗತಿಯಾಗಿದೆ. ಅತ್ಯಾಚಾರ ಮತ್ತು ಸಾಮೂಹಿಕ ಕೊಲೆಗಳಂತಹ ಘೋರ ಅಪರಾಧಗಳ ಆರೋಪ ಹೊತ್ತವರ ರಕ್ಷಣೆಗೆ ಧಾರ್ಮಿಕ ಮುಖಂಡರು ಧಾವಿಸುತ್ತಿರುವುದು ಇಡೀ ಕರ್ನಾಟಕದ ಪ್ರಜ್ಞಾವಂತ ನಾಗರಿಕರ ಆತ್ಮಸಾಕ್ಷಿಯನ್ನು ಘಾಸಿಗೊಳಿಸಿದೆ.

ಧಾರ್ಮಿಕ ವಿಚಾರಗಳಿಗಿಂತ ರಾಜಕೀಯ ಸಂಗತಿಗಳಲ್ಲೇ ಮುಳುಗಿರುವ ಕಲಬುರ್ಗಿಯ ಪ್ರಣವಾನಂದ ನೇತೃತ್ವದ ಸ್ವಾಮಿಗಳ ಗುಂಪು ಧರ್ಮಸ್ಥಳಕ್ಕೆ ಭೇಟಿ ನೀಡಿ, ಕೇವಲ ಧಾರ್ಮಿಕ ಹಿನ್ನೆಲೆ ಅಥವಾ ಪ್ರಭಾವದ ಕಾರಣಕ್ಕೆ ಆರೋಪಿಗಳ ಪರವಾಗಿ ಮರುಕ ತೋರಿಸಬೇಕು ಎಂದು ಸರ್ಕಾರದ ಮೇಲೆ ಒತ್ತಡ ಹೇರುತ್ತಿರುವುದು ಧರ್ಮದ ಹೆಸರಿನಲ್ಲಿ ನಡೆಯುತ್ತಿರುವ ಅಧರ್ಮದ ಪರಮಾವಧಿ. ಸಾಮಾನ್ಯ ಜನರಿಗೊಂದು ಕಾನೂನು, ಪ್ರಭಾವಿ ಧಾರ್ಮಿಕ ವ್ಯಕ್ತಿಗಳಿಗೊಂದು ಕಾನೂನು ಇದೆಯೇ ಎಂಬ ಮೂಲಭೂತ ಪ್ರಶ್ನೆ ಇಂದು ಸಮಾಜವನ್ನು ಕಾಡುತ್ತಿದೆ. ಅಪರಾಧ ಎಸಗಿದ ವ್ಯಕ್ತಿ ಎಷ್ಟೇ ದೊಡ್ಡ ಪೀಠದಲ್ಲಿದ್ದರೂ ಆತ ಕಾನೂನಿನ ದೃಷ್ಟಿಯಲ್ಲಿ ಕೇವಲ ಒಬ್ಬ ಅಪರಾಧಿ ಮಾತ್ರ. ಅಂತಹವರಿಗೆ ಧರ್ಮದ ಮುಸುಕು ಹೊದಿಸಿ ರಕ್ಷಿಸಲು ಹೊರಡುವುದು ಇಡೀ ನ್ಯಾಯಾಂಗ ವ್ಯವಸ್ಥೆಗೆ ಮಾಡುವ ಅಪಚಾರವಾಗಿದೆ.

ಇಲ್ಲಿ ಕೇವಲ ಧಾರ್ಮಿಕ ಮುಖಂಡರ ಹಸ್ತಕ್ಷೇಪ ಮಾತ್ರವಲ್ಲ, ಇಡೀ ರಾಜ್ಯ ಸರ್ಕಾರವೇ ವ್ಯವಸ್ಥಿತವಾಗಿ ಆರೋಪಿಗಳ ಬೆಂಬಲಕ್ಕೆ ನಿಂತಂತೆ ಮೇಲ್ನೋಟಕ್ಕೆ ಭಾಸವಾಗುತ್ತಿದೆ. ಪಕ್ಷ ಬೇಧವಿಲ್ಲದೇ ರಾಜಕಾರಣಿಗಳೂ ಸಹ ಧರ್ಮಸ್ಥಳದ ಅತ್ಯಾಚಾರಿಗಳು ಮತ್ತು ಹಂತಕರ ರಕ್ಷಣೆಗೆ ಟೊಂಕ ಕಟ್ಟಿ ನಿಂತಿದ್ದಾರೆ. ನಾಗರಿಕರ ಒತ್ತಡಕ್ಕೆ ತಲೆಬಾಗಿ ಅತ್ಯಾಚಾರ ಮತ್ತು ಕೊಲೆಗಳ ಸತ್ಯಾಸತ್ಯತೆಯನ್ನು ಹೊರತರಲು ಸರ್ಕಾರ ರಚಿಸಿರುವ ವಿಶೇಷ ತನಿಖಾ ತಂಡ (ಎಸ್‍ಐಟಿ) ರಚನೆಯಾಗಿ ವರ್ಷ ಕಳೆದರೂ ಇಂದಿಗೂ ತನ್ನ ಅಂತಿಮ ವರದಿಯನ್ನು ಸಲ್ಲಿಸಲು ಸಾಧ್ಯವಾಗಿಲ್ಲ. ಈ ವಿಳಂಬ ನೀತಿಯೇ ಧಾರ್ಮಿಕ ಹಾಗೂ ರಾಜಕೀಯ ಶಕ್ತಿಗಳು ತನಿಖಾ ಸಂಸ್ಥೆಯ ಮೇಲೆ ತರುತ್ತಿರುವ ತೀವ್ರ ಒತ್ತಡಕ್ಕೆ ಸಾಕ್ಷಿಯಾಗಿದೆ. ನಿರಂತರ ಹಸ್ತಕ್ಷೇಪಗಳು ಎಸ್‍ಐಟಿ ಸ್ವತಂತ್ರವಾಗಿ ಕಾರ್ಯನಿರ್ವಹಿಸದಂತೆ ತಡೆಯೊಡ್ಡುತ್ತಿವೆ. ತನಿಖೆಯು ರಾಜಕೀಯ ದಾಳವಾಗಿ ಮಾರ್ಪಟ್ಟಿರುವುದು ಸಾರ್ವಜನಿಕ ಆಕ್ರೋಶಕ್ಕೆ ಕಾರಣವಾಗಿದೆ.

ಮಠಾಧೀಶರು ತಮ್ಮ ಮಠದ ಗಡಿ ದಾಟಿ, ರಾಜಕೀಯ ಮತ್ತು ಕ್ರಿಮಿನಲ್ ಪ್ರಕರಣಗಳ ಮಡುವಿಗೆ ಧುಮುಕುವುದನ್ನು ತಡೆಯಲು ಪ್ರಬಲ ಜನಾಗ್ರಹದ ಅಗತ್ಯವಿದೆ. ಕಾನೂನು ಜಾರಿ ಸಂಸ್ಥೆಗಳು ಯಾವುದೇ ಪ್ರಭಾವಕ್ಕೆ ಮಣಿಯದೆ ಮುಕ್ತವಾಗಿ ಕೆಲಸ ಮಾಡಲು ಬಿಡಬೇಕು. ಧಾರ್ಮಿಕ ಮತ್ತು ರಾಜಕೀಯ ನಾಯಕರನ್ನು ಈ ಸೂಕ್ಷ್ಮ ಪ್ರಕರಣದಿಂದ ದೂರವಿಟ್ಟು, ಸಂತ್ರಸ್ತರಿಗೆ ಶೀಘ್ರವಾಗಿ ನ್ಯಾಯ ಸಿಗುವಂತೆ ಮಾಡುವುದು ಇಂದಿನ ತುರ್ತು ಅಗತ್ಯವಾಗಿದೆ. ತನಿಖೆಯ ಹಾದಿಗೆ ಅಡ್ಡಿಪಡಿಸುವ ಪ್ರಭಾವಿ ಶಕ್ತಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳದಿದ್ದರೆ, ಜನಸಾಮಾನ್ಯರಿಗೆ ಕಾನೂನಿನ ಮೇಲಿರುವ ವಿಶ್ವಾಸವೇ ಸಂಪೂರ್ಣವಾಗಿ ನಾಶವಾಗಲಿದೆ. ಈ ಅನ್ಯಾಯದ ವಿರುದ್ಧ ಪ್ರಜಾಪ್ರಭುತ್ವದ ಆಧಾರಸ್ತಂಭಗಳು ಒಗ್ಗೂಡಿ ಧ್ವನಿ ಎತ್ತಬೇಕಿದೆ.