ಎದೆಯುಬ್ಬಿಸುವ ಬಡಾಯಿ ಮತ್ತು ಖಾಲಿಯಾದ ಬೊಕ್ಕಸ

 ಅಲವಾದರಲವೆನ್ನಿ * ಬಿವಿಸೀ

ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ತಮ್ಮ ಸರ್ಕಾರದ ಗ್ಯಾರಂಟಿ ಯೋಜನೆಗಳನ್ನು ಐತಿಹಾಸಿಕ ಮತ್ತು `ಜಾಗತಿಕವಾಗಿ ಮೆಚ್ಚುಗೆ ಪಡೆದವು' ಎಂದು ಬಿಂಬಿಸುವ ಯಾವುದೇ ಅವಕಾಶವನ್ನು ಕಳೆದುಕೊಳ್ಳುವುದಿಲ್ಲ. ಈ ವಾದವನ್ನು ಅವರು ಎಷ್ಟು ಬಾರಿ ಪುನರಾವರ್ತಿಸುತ್ತಾರೆಂದರೆ, ಅದರ ಬಗ್ಗೆ ಚರ್ಚೆಯೇ ಇರಬಾರದು ಎಂಬಂತಿದೆ. ಆದರೆ ಅವರ ಪತ್ರಿಕಾಗೋಷ್ಠಿಗಳು ಮತ್ತು ಬಹಿರಂಗ ಸಭೆಗಳ ಹೊರಗೆ, ರಾಜ್ಯವು ಅತ್ಯಂತ ಕಠಿಣವಾದ ವಾಸ್ತವವನ್ನು ಎದುರಿಸುತ್ತಿದೆ.

ಹಿಂದಿನ ವರ್ಷಗಳಲ್ಲಿ ಸರ್ಕಾರಿ ಕಾಮಗಾರಿಗಳನ್ನು ಪೂರೈಸಿದ ಗುತ್ತಿಗೆದಾರರು ತಮ್ಮ ಬಾಕಿ ಹಣಕ್ಕಾಗಿ ಇಂದಿಗೂ ಕಾಯುತ್ತಿದ್ದಾರೆ. ಊರೂರು ಅಲೆಯುತ್ತ ಸರಕಾರದ ದಿವಾಳಿತನ ಮತ್ತು ತಮ್ಮ ಪ್ರತಿಭಟನೆ ಕುರಿತು ಜನರಿಗೆ ತಿಳಿಸುತ್ತಿದ್ದಾರೆ. ಗುತ್ತಿಗೆದಾರರ ಬಿಲ್‍ಗಳು ವರ್ಷಗಳಿಂದ ಪೆಂಡಿಂಗ್ ಇವೆ. ಹಣ ಪಾವತಿಯಾಗದೆ ಕೆಲಸ ಮುಂದುವರಿಸಲು ಸಾಧ್ಯವಾಗದೆ ಅನೇಕರು ಚಾಲ್ತಿಯಲ್ಲಿರುವ ಯೋಜನೆಗಳನ್ನು ಸ್ಥಗಿತಗೊಳಿಸಿದ್ದಾರೆ ಅಥವಾ ವೇಗ ಕಡಿಮೆ ಮಾಡಿದ್ದಾರೆ. ಹಲವಾರು ಇಲಾಖೆಗಳ ಸರ್ಕಾರಿ ನೌಕರರು ಸಂಬಳ ವಿಳಂಬದ ಬಗ್ಗೆ ದೂರು ನೀಡುತ್ತಿದ್ದಾರೆ. ಹದಗೆಟ್ಟ ರಸ್ತೆಗಳು, ನಿರ್ವಹಣೆಯಿಲ್ಲದ ಆಸ್ಪತ್ರೆಗಳು ಮತ್ತು ದುರಸ್ತಿಗೆ ಕಾಯುತ್ತಿರುವ ಸರ್ಕಾರಿ ಕಟ್ಟಡಗಳು ರಾಜ್ಯದ ಮೂಲಸೌಕರ್ಯದ ದುಸ್ಥಿತಿಯನ್ನು ಸಾರುತ್ತಿವೆ.

ಇದೇ ಸಮಯದಲ್ಲಿ, ವಿವಿಧ ಇಲಾಖೆಗಳಲ್ಲಿನ ಸಾವಿರಾರು ಹುದ್ದೆಗಳು ವರ್ಷಗಳಿಂದ ಭರ್ತಿಯಾಗದೆ ಖಾಲಿ ಇವೆ. ಕಾಯಂ ನೇಮಕಾತಿಯ ಬದಲಿಗೆ, ಆಡಳಿತವು ಗುತ್ತಿಗೆ ಆಧಾರಿತ ಸಿಬ್ಬಂದಿಗಳ ಮೇಲೆ ಅತಿಯಾಗಿ ಅವಲಂಬಿತವಾಗಿದೆ. ಇದು ಕಾಗದದ ಮೇಲೆ ತಕ್ಷಣದ ಹಣಕಾಸಿನ ಹೊರೆಯನ್ನು ಕಡಿಮೆ ಮಾಡಬಹುದು, ಆದರೆ ಇದು ಸಾಂಸ್ಥಿಕ ಸಾಮಥ್ರ್ಯ ಮತ್ತು ಹೊಣೆಗಾರಿಕೆಯನ್ನು ದುರ್ಬಲಗೊಳಿಸುತ್ತದೆ. ತಾತ್ಕಾಲಿಕ ವ್ಯವಸ್ಥೆಗಳ ಮೇಲೆ ದೀರ್ಘಕಾಲ ಆಡಳಿತ ನಡೆಸಲು ಸಾಧ್ಯವಿಲ್ಲ.

ಇಲ್ಲಿ ಪ್ರಶ್ನೆ ಕೇವಲ ಕಲ್ಯಾಣ ಯೋಜನೆಗಳು ಅಗತ್ಯವೇ ಅಥವಾ ಇಲ್ಲವೇ ಎಂಬುದಲ್ಲ. ಖಂಡಿತವಾಗಿಯೂ ಮಿತವಾಗಿ ಸಾಮಾಜಿಕ ಭದ್ರತೆ ಯಾವುದೇ ಸರ್ಕಾರದ ಜವಾಬ್ದಾರಿ. ಆದರೆ ಅಸಲಿ ಪ್ರಶ್ನೆ ಇದರ ಸುಸ್ಥಿರತೆ ಮತ್ತು ಸಮತೋಲನದ ಬಗ್ಗೆ ಇದೆ. ಬಂಡವಾಳ ಹೂಡಿಕೆ ಮತ್ತು ಮೂಲಭೂತ ಆಡಳಿತಾತ್ಮಕ ಹೊಣೆಗಾರಿಕೆಗಳನ್ನು ನಿರ್ಲಕ್ಷಿಸಿ, ರಾಜ್ಯವು ಕೇವಲ ವೆಚ್ಚವನ್ನು ಮಾತ್ರ ಹೆಚ್ಚಿಸಲು ಸಾಧ್ಯವೇ? ಮೂಲಭೂತ ಸೇವೆಗಳಿಗೆ ಹಣವಿಲ್ಲದೆ ಪರದಾಡುತ್ತಿರುವಾಗ ಗ್ಯಾರಂಟಿಗಳನ್ನು ಸಂಭ್ರಮಿಸುವುದು ಸರಿಯೇ?

ರಾಜಕೀಯ ಸಂದೇಶಗಳು ಅಲ್ಪಾವಧಿಗೆ ಲಾಭ ನೀಡಬಹುದು. ಆದರೆ ಸಾರ್ವಜನಿಕ ಹಣಕಾಸು ವ್ಯವಸ್ಥೆಯು ತನ್ನದೇ ಆದ ಲೆಕ್ಕಾಚಾರವನ್ನು ಹೊಂದಿದೆ. ಗುತ್ತಿಗೆದಾರರು ಟೆಂಡರ್ ಹಾಕುವುದನ್ನು ನಿಲ್ಲಿಸಿದಾಗ, ಮೂಲಸೌಕರ್ಯಗಳು ಹಾಳಾದಾಗ ಮತ್ತು ಉದ್ಯೋಗಿಗಳು ಅಸುರಕ್ಷಿತರಾದಾಗ ಅದರ ಹೊರೆಯನ್ನು ನಾಗರಿಕರು ಅನುಭವಿಸಬೇಕಾಗುತ್ತದೆ, ಕೇವಲ ಘೋಷಣೆಗಳಿಂದ ಸಮಸ್ಯೆ ಬಗೆಹರಿಯುವುದಿಲ್ಲ. ಇಂದು ಲಂಚಾವತಾರ ಸರಕಾರದ ವಿವಿಧ ಇಲಾಖೆಗಳಲ್ಲಿ ಎಷ್ಟು ವ್ಯಾಪಿಸಿದೆಯೆಂದರೆ, ಸಾಮಾನ್ಯ ನಾಗರಿಕರ ಬದುಕನ್ನು ಹಿಂಡಿ ಹಿಪ್ಪೆ ಮಾಡುತ್ತಿದೆ. ಆದರೆ ಸರಕಾರಿ ವರಿಷ್ಠರ ನೀತಿ ``ನೀವೂ ತಿನ್ನಿ, ನಮಗೂ ತಿನ್ನಿಸಿ'' ಎಂಬಂತಿದೆ.

ಇದು ಎಷ್ಟು ದಿನ ಮುಂದುವರಿಯಲು ಸಾಧ್ಯ? ಹಣಕಾಸಿನ ಒತ್ತಡವು ಅಂತಿಮವಾಗಿ ಆಡಳಿತದ ಪಾಶ್ರ್ವವಾಯುವಿಗೆ ಕಾರಣವಾಗುತ್ತದೆ. ಗ್ಯಾರಂಟಿಗಳ ಬಗ್ಗೆ ಹೆಮ್ಮೆಪಡುವ ಸರ್ಕಾರವು ಸಮಯಕ್ಕೆ ಸರಿಯಾದ ಪಾವತಿ, ಸಮರ್ಪಕವಾಗಿ ಕಾರ್ಯನಿರ್ವಹಿಸುವ ಸಂಸ್ಥೆಗಳು ಮತ್ತು ವಿಶ್ವಾಸಾರ್ಹ ಹಣಕಾಸಿನ ಶಿಸ್ತಿನ ಬಗ್ಗೆಯೂ ಗ್ಯಾರಂಟಿ ನೀಡಬೇಕಿದೆ. ಇಲ್ಲದಿದ್ದರೆ, ಚಪ್ಪಾಳೆಗಳು ಕ್ರಮೇಣ ಕಡಿಮೆಯಾಗುತ್ತವೆ ಮತ್ತು ಭಾಷಣಗಳಿಗಿಂತ ಬಜೆಟ್‍ನ ಬಾಕಿ ಪಟ್ಟಿಯೇ ಜೋರಾಗಿ ಮಾತನಾಡಲು ಶುರುಮಾಡುತ್ತದೆ.